გათავისუფლებულმა ექიმებმა გამგებელს მიმართეს

სამედიცინო დაწესებულებიდან გათავისუფლებულმა უბნის ექიმებმა და ექთნებმა ბესიკ ხითარიშვილს სავადმყოფოში მიმდინარე მოვლენები გააცნეს და დახმარება სთხოვეს.

- ”მივმართეთ გამგებელს და ძალიან დიდი იმდებით გამოგვიშვა. გვირჩია მივსულიყავით მის მოადგილესთან, ავთანდილ თელიაშვილთან, რომელმაც მითითება მოგვცა თუ რა მიმართულებით უნდა ვიმუშაოთ”, - ამბობს ნაზი პონიატოვსკი, რომელიც ”უნიმედი სამცხეს” ახალციხის სამედიცინო დაწესებულებიდან 30 ნოემბერს გაათავისუფლეს.

გათავისუფლებული ექიმები საჩივრის შეტანას სასამრთლოშიც აპირებენ.

”გამგებელი დაგვპირდა, ყველანაირად ვეცდებით პოლიკლინიკა გამოეყოს და ქალაქში დაბრუნდესო. თუ ასე მოხდა, მე მგონი ყველა თანამშრომელი აღდგება. გავიგებთ, მართლა გაუქმდა თუ არა ჩვენი პროგრამა და ამ მიმართულებითაც გავაგრძელებთ ბრძოლას”, - ამბობს ნაზი პონიატოვსკი.

ახალციხის მუნიციპალიტეტის გამგებლის მოვალეობის შემსრულებლის ბესიკ ხითარიშვილის თქმით, პირველ ეტაპზე გასარკვევია მართლა გაუქმდა თუ არა პროგრამა, რომლის ფარგლებშიც ეს ადამიანები მუშაობდნენ. საუბარია სახელმწიფო პროგრამაზე, რომელიც 0-დან 6 წლამდე ბავშვებისა და 60-წელს ზემოთ ასაკის ადამიანების მომსახურებას ითვალისწინებდა.

”არც პოლიკლინიკის შენობა აღარ იყო და ეს ხალხი ჰაერში დარჩა. გვაქვს რაღაც სამომავლო გეგმები იმასთან დაკავშირებით, რომ ისევ ქალაქის ცენტრალურ ტერიტორიაზე მოვძებნოთ ალტერნატიული ფართი, სადაც განთავსდება ახალციხის პოლიკლინიკა”, - განმარტავს ბესიკ ხითარიშვილი.

მისივე თქმით, ადგილობრივი ხელისუფლება შეეცდება გაარკვიოს მოქმედებს თუ არა ისევ აღნიშნული პროგრამა: ”თუ ეს პროგრამა მოქმედებს, შესაბამისად ალბათ ეს ხალხიც დასაქმდება. ჯერ გადაჭრით ვერაფერს ვამბობ. მაგრამ ის, რომ პოლიკლინიკის შენობა გადმოვიდეს ქალაქის ტერიტორიაზე, გეგმაში გვაქვს და ამ საკითხზე კონსულტაციები მიმდინარეობს”.

შეგახსენებთ, ყოფილი პოლიკლინიკის 14 თანამშრომელს უნიმედი სამცხე“ 30 ნოემბერს დაატოვებინეს. საავადმყოფოში პრობლემები მას შემდეგ დაიწყო, რაც მისი მფლობელი ”ალდაგი ბისიაი” გახდა. ამიტომ, ექიმები საავადმყოფოდან კომპანიის გასვლასაც ითხოვენ.

[თამარ თოთაძე, ახალციხე]