ახალციხის ცენტრში "დრო გაჩერდა"

როდის დამონტაჟდა ქუჩის საათი და რა გახდა მისი გაჩერების მიზეზი - ადგილობრივ მოსახლეობას ინფორმაცია არ აქვს. თუმცა ფიქრობენ, რომ რადგან ადგილობრივმა ხელისუფლებამ მისი დადგმა გადაწყვიტა, მუშაობაზეც უნდა იზრუნოს.

„რამდენიმე თვეა საათი გაჩერებულია, მაგრამ როცა მუშაობდა, არც მაშინ აჩვენებდა ზუსტ დროს, ხან წინ იყო, ხან უკან. რაც ამის დადგმისთვის თანხები დაიხარჯა, ჯობდა, სხვა უფრო მნიშვნელოვანი საკითხებისთვის მოეხმარებინათ, თუნდაც ღარიბი ოჯახებისთვის დაერიგებინათ“,- ამბობს ზაურ გიგოლაშვილი, რომელიც საათის მიმდებარე ტერიტორიაზე წლებია ტაქსის მძღოლად მუშაობს.

მარიამ დავლაშერიძე სტუდენტია და ყოველდღიურად იმ ქუჩაზე დადის სადაც საათი დგას, თუმცა მუშაობდა თუ არა, ამ დრომდე არ შეუნიშნავს: „არასდროს შემიხედავს, გვიან შევნიშნე და არ დავკვირვებივარ მუშაობს თუ არა".

როდის დაიდგა და რა დაჯდა საათის დამონტაჟება ქალაქის ცენტრალურ ქუჩაზე, ადგილობრივ თვითმმართველობაში ინფორმაცია არ აქვთ. ქალაქის რწმუნებულმა დავით სამსონიძემ განაცხადა, რომ რატომ არ მუშაობს ამ დრომდე საათი, ამ საკითხით დაინტერესდება. იმის გასაგებად, როდის დაიდგა და რა თანხა დაიხარჯა ამისთვის, მუნიციპალიტეტის ფინანსურ სამსახურში გადაგვამისამართა.

ინფორმაციას არ ფლობენ მუნიციპალიტეტის გამგეობის ფინანსურ სამსახურშიც.

ეკონომიკის სამსახურის უფროსის თენგიზ ზედგინიძის განმარტებით, საათი შესაძლოა 2005 ან 2006 წელს დაიდგა: „ზუსტად ვერ გეტყვით, თბილისიდან გამოაგზავნეს და დაიდგა, იმ პერიოდში ქონების მართვის სამსახურში ვმუშაობდი. გამგეობაში არ ვიყავი, სულ სხვა სამსახური იყო და ზუსტი ინფორმაცია არ მაქვს“.

მას შემდეგ, რაც საათის შესახებ ინფორმაციის მოკვლევა "სამხრეთის კარიბჭემ" დაიწყო, საათის მდგომარეობით ქალაქის რწმუნებული და "ენერგო-პრო ჯორჯიას" თანამშრომლებიც დაინტერესდნენ.

„საათი დენის მეშვეობით მუშაობდა, ყოფილი პოლიკლინიკის შენობის გასხვისების შემდეგ, საათს დენი აღარ მოეწოდება. ენერგოკომპანიის თანამშრომლებთან ერთად სიტუაციაში ვერკვევით და სავარაუდოდ რამდენიმე დღეში ავამუშავებთ“, განაცხადა ქალაქის რწმუნებულმა.

შეგახსენებთ, რომ ყოფილი პოლიკლინიკა 2011 წლის სექტემბერში გასხვისდა.

[თინათინ ზაზაძე, ახალციხე]