ბორჯომში, ბანიხევის მცხოვრებლები შველას ითხოვენ

სოფელ ბანიხევში გზა რამდენიმე ათეული წელია დანგრეულია. ადგილობრივებს პრობლემები განსაკუთრებთ წვიმიან ამინდში ექმნებათ. გარდა ამისა, გზა იმდენად ვიწროა, რომ ორი მანქანა ერთმანეთს გვერდს ვერ უქცევს.

თუმცა, აქაურების პრობლემა მხოლოდ ეს არ არის. ისინი ამბობენ, რომ განსაკუთრებით საშიშია მდინარე, რომელიც შუა სოფელში ჩადის, გზას აკრავს და ნაპირსამაგრი ჯებირი არ აქვს.

„ყოფილა შემთხვევა, როდესაც წყალი ადიდებულა და სახლებში შემოვარდნილა. ერთხელ ერთი ასაკიანი ქალიც გაიტაცა, მისი გადარჩენა ვერ მოვასწარით“, - აცხადებენ ბანიხეველები.



ისინი ამბობენ, რომ წყლის მოვარდნის საშიშროება ყოვეელთვის არსებობს, განსაკუთრებით გაზაფხულზე.

კიდევ ერთი საფრთხე, რაზეც ბანიხევში გვიყვებიან, სოფლის ერთი ნაწილიდან მეორესთან დამაკავშირებელი ხიდია.

„ჩამტვრეულია ფიცრები, მაგრამ რა ვქნათ, მაინც დავდივართ. წყალსაც იმ მხრიდან ვეზიდებით“, – ამბობენ ადგილობრივები.



ბანიხეველები ამბობენ, რომ რამდენიმე თვის წინ სოფელში ბორჯომის მუნიციპალიტეტის გამგებელი დიმიტრი ყიფიანი იმყოფებოდა. გამგებელი ხალხს გზისა და ხიდის შეკეთებას დაჰპირდა.

„მას შემდეგ არც გამგებელი გამოჩენილა და არც სამუშაოები დაწყებულა. ელოდებიან, არჩევნები რომ მოვა, მერე მოვლენ და ხმების სანაცვლოდ გზის გაკეთებას დაგვპირდებიან. იმასაც ან გააკეთებენ, ან არა“, – ამბობენ ბანიხევში.

ბორჯომის მუნიციპალიტეტის გამგეობაში განმარტავენ, რომ ბანიხევში წელს მხოლოდ გზა მოიხრეშება, რისთვისაც 17.716 ლარი დაიხარჯება.

„ბანიხევის გზაზე წელს დაგეგმილია მოხრეშვის სამუშაოები, რაც მოსახლეობამ კრებაზე თავად შეარჩია“, – ამბობენ გამგეობაში.

მათივე თქმით, უსაფრთხოების მიზნით, ბანიხევის ცენტრალურ გზასთან დამაკავშირებელ მონაკვეთზე სარკე დამონტაჟდება.

რა ბედი ელის, მოშლილ ხიდსა და წყლის სანაპიროს, რომელიც ჯებირების გარეშეა, გამგეობაში ამაზე ვერ გვპასუხობენ.

[ლუბა გიორგაძე, ბორჯომი]