შემოდგომით ბორჯომის პარკის რეაბილიტაცია იგეგმება

ბორჯომის მუნიციპალიტეტის გამგეობაში ამბობენ, რომ ცენტრალური პარკის რეაბილიტაციისთვის მილიონ ლარზე მეტი დაიხარჯება. აღნიშნული თანხა საქართველოს რეგიონული განვითარებისა და ინფრასტრუქტურის სამინისტროდან გამოიყოფა.

ბორჯომის მუნიციპალიტეტის გამგებლის დიმიტრი ბერიძის თქმით სამუშაოებს ტენდერში გამარკვებული კომპანია შპს „ექსპრეს სერვისი“ შეასრულებს.

„ცხრა აპრილის სკვერი მთლიანად მოპირკეთდება, მოეწყობა ცივი წყლის წყარო, რომელიც ხიდის იქით იყო და მეორე მხარეს გადმოვიტანთ“, - ამბობს ბორჯომის მუნიციპალიტეტის გამგებელი.

მისივე თქმით, სარეაბილიტაციო სამუშაოები მომდევნო კვირიდან დაიწყება.

„სატენდერო დოკუმენტაცია მომზადებულია, გაფორმდება ხელშეკრულება და დაიწყება სამუშაოები“, - ამბობს დიმიტრი ბერიძე.

[თამარ თოთაძე, ბორჯომი]