რატომ უპირისპირდებიან ერთმანეთს რეინჯერები და ბანიხეველები

მამუკა გოგოლაძე

გუშინ, 31 მაისს, ბორჯომის სოფელ ბანიხევში, ადგილობრივებისა და რეინჯერების დაპირისპირების გამო დაკავებულმა მამა-შვილმა, პოლიციის განყოფილებაში ერთი ღამე გაატარა. მამა-შვილმა გოგოლაძეებმა ბორჯომის პოლიცია დღეს 1 ივნისს, დღის 12:00 საათისათვის დატოვეს.

ისინი ამბობენ, რომ სამართალდამცველების ბანიხევში ტყის რეინჯერებთან დაპირისპირებას ეხებოდა.

„გუშინ ხუთი საათისათვის დაგვაკავეს და დღეს გამოგვიშვეს. ჯერ არ ვიცით რამეს თუ გადაგვახდევინებენ, გვითხრეს გაგაგებინებთ ყველაფერსო და ექსპერტიზაზე გაგვიშვეს“, -ამბობს ინცინდენტში მონაწილე მამუკა გოგოლაძე.

გოგოლაძეს სხეულზე დაზიანებები არ აქვს, თუმცა რეინჯერის ავტომანქანასთან შეჯახების შედეგად, მის მიკროავტობუსს წინა ფარები და საქარე მინა დაუზიანდა: „ცხვირში დამარტყა და სისხლი წამომივიდა, ჩემი მარშუტკაა მარტო დაზიანებული“.


ბანიხევში, გუშინ მომხდარი ინციდენტის ადგილას, ავტომანქანების ფარების ნამსხვრევები ისევ ყრია. თუმცა, ადგილობრივებს წინა დღეს მომხდარ დაპირისპირებაზე საუბარი არ სურთ.

„არ ვიცით ზუსტად რა მოხდა. მარტო ის ვიცი, რომ სოფლის ბოლოს პოლიციის მანქანებს გზა ჰქონდათ გადაკეტილი. ვინ ვის ეჩხუბებოდა, რა ვიცით“, -ამბობენ ადგილობრივები.

შეგახსენებთ, რომ გუშინ სოფელ ბანიხევში ადგილობრივები და ტყის მცველები ერთმანეთს დაუპირისპირდნენ. როგორც სოფელში ამბობენ, ერთ-ერთი ადგილობრივი საკუთარი მიკროავტობუსით ბაღიდან ბრუნდებოდა, როდესაც სოფლის შემოსასვლეში რეინჯერების ავტომანქანა დაეჯახა. რეინჯერებმა ტრანსპორტის გაჩხრეკვა სცადეს. ადგილზე სამართალდამცველებიც იყვნენ მობილიზებულნი, რომლებმაც ინცინდენტში მონაწილე ორი პირი დააკავეს.

ადგილობრივები მომხდარს, ორი კვირის წინ, თანასოფლელისა და ბორჯომ-ხარაგაულის ეროვნული ტყე-პარკის რეინჯერის რეზო ქიმაძის დაპირისპირებას უკავშირებენ, რომელიც, მათივე თქმით, 31 მაისის ინციდენტშიც მონაწილეობდა.

„სამხრეთის კარიბჭე“ მთელი დღის განმავლობაში ცდილობდა დაპირისპირებაში მონაწილე რეინჯერებთან, მათ შორის რეზო ქიმაძესთან დაკავშირებას, თუმცა უშედეგოდ.

ინცინდეტნის შესახებ კი, გარემოს დაცვისა და ბუნებრივი რესურსების სამინისტროში განაცხადეს, რომ დაპირისპირება მას შემდეგ მოხდა, რაც რეინჯერები, ადგილობრივების მიერ ხის უკანონოდ ჭრის ფაქტს შეესწრნენ. მათივე ინფორმაციით, ნაცემია ხუთი რეინჯერი და დაზიანებულია „პიკაპის“ მარკის ორი ავტომანქანა.

რეინჯერების ავტომანქანებიც და ადგილობრივის მიკროავტობუსიც, ამ დროისათვის, ბორჯომის პოლიციის რაიონული განყოფილების ეზოში დგას. მომხდარზე შსს გამოძიებას 125–ე, ცემის მუხლით აწარმოებს.

თუმცა, მაისის თვეში, ეს რეინჯერებისა და ადგილობრივების დაპირისპირების პირველი შემთხვევა არ არის, რომელსაც შინაგან საქმეთა სამინისტრო იძიებს.

სამცხე-ჯავახეთის სატყეო სამსახურის თანამშრომლებზე თავდასხმასთან დაკავშირებით, პირველად გარემოს დაცვისა და ბუნებრივი რესურესების დაცვის სამინისტრომ განცხადება 20 მაისს გაავრცელა.

განცხადების მიხედვით, ბრაკონიერებმა, ბორჯომის უბნის ტყის მცველს ზურაბ ბლიაძეს, საცხოვრებელი სახლის ეზოში „BMW“-ს მარკის ავტომობილი დაუწვეს. ამავე უბნის უბროსს მიხეილ ცხაკაიას სახლს კი ქვები დაუშინეს.

მაშინ არცერთმა მათგანმა დეტალებზე „სამხრეთის კარიბჭესთან“ საუბარი არ ისურვა. მათგან განსხვავებით, ორი კვირის წინ მომხდარი თავდასხმის დეტალები გაიხსენა ბორჯომ-ხარაგაულის ეროვნული პარკის უბნის უფროსმა რეინჯერმა რეზო ქიმაძემ. იგი ცემაში ბანიხევის მკვიდრს გიორგი ჩადუნელს ადანაშაულებდა. ამბობდა, რომ ჩადუნელი თავს მოულოდნელად დაესხა.


რეზო ქიმაძე

რეინჯერისგან განსხვავებული ვერსიები აქვთ, ბანიხევის მკვიდრებს. ცემაში ბრალდებულის მეზობლები ყვებიან, რომ რეინჯერმა ჩადუნელს შეაგინა, რის შემდეგაც მან დაარტყა.

„თავისას რატომ არ ამბობს, რომ უგინებია, აბა გიჟი კი არ იყო, მივარდნოდა და უმიზეზოდ ეცემა. თვითონ ყოველთვის უხეშად იქცევიან, ჩვენ რამეს ვეტყვით და დამნაშავეები ვხდებით“, - ამბობს ბანიხევის მცხოვრები.

ადგილობრივები ამბობენ, რომ შემოდგომით სატყეო დეპარტამენტი, მათ ბილეთით მხოლოდ 5 კუბურმეტრ ხის მერქანს აძლევს, რაც გამოსაზამთრებლად არ ჰყოფნით, ამიტომ იძულებულნი ხდებიან ხე უკანონოდ მოიპოვონ. სწორედ ეს ხდება რეინჯერებისა და ადგილობრივების დაპირისპირების მიზეზი: „შვილებს ხომ არ გავყინავთ, ტყეში ვცხოვრობთ და გასათბობად შეშა არ გვაქვს“.

როგორც შსს-ში განმარტავენ, ორი კვირის წინ, მხოლოდ ბორჯომში ტყის მცველებზე მომხდარ თავდასხმის ფაქტზე, ერთი პირია მხილებული, რომლიც დანაშაულს აღიარებს. რაც შეეხება ავტომობილის დაწვისა და საცხოვრებელ სახლზე ქვების დაშენის ფაქტებს, გამოძიება ისევ მიმდინარეობს.



[ლუბა გიორგაძე, ბორჯომი]