ბორჯომის ეროვნული პარკის ადმინისტრაცია ბანიხევში მომხდარს ეხმაურება

31 მაისს, ბორჯომის სოფელ ბანიხევში მომხდარ ინცინდენტს, სადაც ერთმანეთს ადგილობრივები და ბორჯომ-ხარაგაულის ეროვნული პარკის რეინჯერები დაუპირისპირდნენ, პარკის ადმინისტრაციის დირექტორი ლევან თაბუნიძე გამოეხმაურა.

მისი თქმით, ინცინდენტში მონაწილე მთავარი პირი, ბანიხევში მცხოვრები მამუკა გოგოლაძეა, როემლიც საკუთარი მიკროავტობუსით დაცულ ტერიტორიაზე უნებართვოდ შევიდა და 2 კუბურიმეტრი საშეშე მერქანი მოჭრა.

„როცა რეინჯერები ამ დგილზე მივიდნენ, გოგოლაძე ხარებით ხეს მიათრევდა. ჩვენი მანქანები რომ დაინახა, ხე ჩახსნა. რეინჯერებმა ადმინისტრაციულ სამართალდარღვევათა ოქმი შეუდგინეს, თუმცა ხელის მოწერა არ ისურვა“, - ამბობს ბორჯომ-ხარაგაულის ეროვნული პარკის ადმინისტრაციის დირექტორი ლევან თაბუნიძე.

ამის შემდეგ, მოჭრილი საშეშე მერქანი რომ არ მოეპარა, რეინჯერები დაცულ ტერიტორიაზე მოჭრილი მორის გასატანად მანქანებით მივიდნენ. როგორც თაბუნიძე ამბობს, მამუკა გოგოლაძემ რეინჯერებს მიკროავტობუსით გზა ამ დროს გადაუკეტა.

„ჩვენს თანამშრომლებს ჰქონდათ საფუძლიანი ეჭვი იმისა, რომ შესაძლოა მოჭრილი საშეშე მერქანი მიკროავტობუსშიც ჰქონდა. ამიტომ ტრანსპორტის შემოწმება სთხოვეს. ამას გოგოლაძის აგრესია მოჰყვა: მან მარშუტკით ჯერ ერთ პიკაპს დაარტყა, მერე მეორეს“, -ამბობს თაბუნიძე და ამატებს, რომ გოგოლაძე ადგილობრივებთან ერთად რეინჯერებს ფიზიკურადაც გაუსწორდა.

ბორჯომ-ხარაგაულის ეროვნული პარკის ადმინისტრაციის დირექტორი ამბობს, რომ საშეშე მერქნის უკანონოდ მოპოვებაში, გოგოლაძე არაერთხელ ჰყავს შემჩნეული და შესაბამისი ოქმებიც არა ერთხელ შეუდგენიათ: „ის ბრაკონიერია, ხე–ტყით ცხოვრობს, ჩემთვის პირადად აქვს ნათქვამი, მე უნდა მოვიპარო და თუ დამიჭერ დამიჭირეო“.

ლევან თაბუნიძე საშეშე მერქნის გამოყოფასთან დაკავშირებითა ადგილობრივების პრეტენზიასაც ეხმაურება. ბანიხეველიბი კი ამბობენ, რომ მათ საწვავად წლის განმავლობაში მხოლოდ 5 კუბურმეტრს აძლევენ, ეს არ ჰყოფნით და იძულებულები არიან უკანონობა ჩაიდინონ.

„ეს არ არის სიმართლე, ყოველწლიურად მთავრობის დადგენილების მიხედვით 7 კუბურმეტრს საშეშე მერქანს იღებენ. მაგ სოფელში გაზიც არის. ისეთ სოფლებში ვაძლევთ 7კუბამეტრ მერქანს, სადაც გაზიც კი არ არის შეყვანილი და იქ უკანონოდ ხეებს არ ჭრიან“, – აცხადებს თაბუნიძე.

მისი თქმით, ადგილობრივები უკანონოდ მოპოვებულ საშეშე მერქანს საწვავად კი არა კომერციული მიზნებისთვის იყენებენ. „ეს ადამიანები იპარავენ ხე-ტყეს და შემდეგ არალეგალურად ყიდიან“.

შეგახსენებთ, რომ რეინჯერები და ბანიხეველები ერთმანეთს 31 მაისს დაუპირისპირდნენ. ცემის ფაქტზე ორი პირი დააკავეს. თუმცა მანამდე, ამავე თვეში ბორჯომში, ბრაკონირების მხრიდან ტყის მცველებზე თავდასხმის კიდევ სამი შემთხვევა გამოვლინდა.

[ლუბა გიორგაძე, ბორჯომი]