‘სოფელში გზა და წყალი გვინდა’ – წინუბანში ადგილობრივები აქციას მართავენ

დღეს, 30 ივლისს დილიდან წინუბანში ათობით ადამიანი ადგილობრივი ხელისუფლების მხრიდან უყურადღებობას აპროტესტებს. მათი ერთ–ერთი მოთხოვნა ახალციხიდან სოფელამდე გზის დაგებაა. როგორც წინუბანში მცხოვრებლები ამბობენ, გზა იმდენად მიუვალია, რომ წვიმიან ამინდში სასწრაფო დახმარების მანქანა სოფლამდე ვერ მიდის: "ყოფილა შემთხვევები, რომ ავადმყოფი გზამდე ხელით მიგვიყვანია. სტუმარი აქ ვერ მოდის, ჩვენც შიშით დავდივართ".

გარდა გზისა, წინუბნელებს წყლის პრობლემაც აწუხებთ, სოფელში ამბობენ, რომ წყალი ცოტა მოდის, თუმცა ისიც დაბინძურებული და ხშირად ქვეწარმავლებიც მოყვება.

მათივე თქმით, სოფელმა ამ საკითხების მოგვარება ახალციხის მერიას წერილობით სთხოვა, თუმცა ამ დრომდე პასუხი არ მიუღიათ: "ათ დღეზე მეტია წერილი შევიტანეთ მერიაში, მაგრამ ყურადღებას არავინ გვაქცევს. რომ ჩავედით და ვიკითხეთ, გვითხრეს მერი შვებულებაშია და ვერ გიპასუხებთო".

ადგილობრივებთან ცოტახნის წინ სოფლის რწმუნებული მივიდა. მისი თქმით, სოფელში გზის და წყლის პრობლემაც მოგვარდება, თუმცა როდის ვერ აკონკრეტებს: "ვმუშაობთ პროექტებზე".



რწმუნებულთან ერთად, წინუბნელებს პრობლემების გადაჭრის შესახებ დაპირება მისცა ახალციხის რაიონული სამმართველოს უფროსის მოადგილე შალვა აღნიაშვილი. "სამხრეთის კარიბჭეს" შეკითხვაზე, თუ რა სტატუსით პირდება იგი ადგილობრივებს წყლისა და გზის პრობლემის მოგვარებას, გვპასუხობს: "ჩვენ ხალხს გვერდით ვუდგავართ და მაქსიმალურად ვცდილობთ მათ დახმარებას".



[sknews.ge]