საბარგო სადგურზე კორპუსების სახურავების შეკეთებას ითხოვენ

საბარგო სადგურზე, აღმაშენებლის 9 და 11 ნომრებში მდებარე ორი ერთსართულიანი კორპუსის მცხოვრებლები ამბობენ, რომ ათეული წელია კორპუსების სახურავები დაზიანებულია და წყალი ჩადის.

„წვიმის დროს ყველა ოთხაში წყალი ჩამოდის, ჭურჭლით დავდივარ, რომ ავეჯი და საწოლები არ დასველდეს. ჭერსაც ვერ ვარემონტებ, რა აზრი აქვს მაინც მალე გამიფუჭდება“, – ამბობს ადგილობრივი შორენა ზურაბაშვილი.

მისივე თქმით, სახურავის ყველაზე დაზიანებულ ნაწილებზე აქ მცხოვრებლებმა რამდენჯერმე თუნუქი გადააფარეს, თუმცა, უშედეგოდ.

ზურაბაშვილების მსგავსად წყალი ჩადის მის მეზობლად მცხოვრებ შვიდ ოჯახშიც: „არაერთხელ მივმართეთ მერიას, დაგვპირდნენ, რომ დაგვეხმარებოდნენ, მაგრამ უკვე წლებია ასეთ მდგომარეობაში ვართ. არჩევნებზე არ იშურებენ დაპირებებს, მაგრამ მერე აღარავის ვახსოვართ“, – ამბობენ ადგილობრივები.

ახალციხის მერიაში ამბობენ, საბარგო სადგურზე აღმაშენებლის 9 და 11 ნომრებში, დაზიანებული სახურავების შეკეთებისათვის, საპროექტო სამუშაოები უკვე მიმდინარეობს: „ახალი თუნუქის სახურავებით გადავხურავთ, მაგრამ ეს მიმდინარე წელს მოეწრება თუ არა არ ვიცით“.



[ლუბა გიორგაძე, ახალციხე]