‘გირჩმა’ ბორჯომსა და ადიგენში ოფისები გახსნა

რეგიონში ‘გირჩის’ ორი ოფისი დღეს, 24 მაისს გაიხსნა. ახალი რაიონული ორგანიზაციების ხელმძღვანელები პარტიის დამფუძნებელმა ზურაბ ჯაფარიძემ წარადგინა.

ბორჯომში, მესხეთის N5-ში გახსნილ ოფისს ბორჯომის მკვიდრი ნიკოლოზ ჯავახიძე უხელმძღვანელებს. იგი ამ დრომდე უმუშევარი იყო. 2014 წლამდე კი ბორჯომის მუნიციპალიტეტის საკრებულოს დეპუტატი გახლდათ. იგი საკრებულოში პარტია „მოძრაობა სამართლიანი საქართველოსთვის“ სიით მოხვდა და ფრაქციას – „გაერთიანებული ბორჯომი“ ხელძღვანელობდა.

ბორჯომის შემდეგ, ოფისი ადიგენში ავტოსადგურის მიმდებარე ტერიტორიაზე გახსნეს. აქ რაიონულ ორგანიზაციას სოფელ ადიგენის მკვიდრი ზურაბ ტაბიძე უხელმძღვანელებს.

ტაბიძე, ადიგენში ბოლოს მომხდარი რელიგიური კონფლიქტის ერთ–ერთი აქტიური მონაწილე იყო. იგი ერთ–ერთი იყო იმ ქრისტიანებს შორის, რომელიც აცხადებდა, რომ სოფელ ადიგენში მუსლიმებს ცალკე სასაფლაოს გახსნის ნებას არასდროს მისცემდა.

ასევე, ბოლო დროს, სწორედ მისი განცხადების საფუძველზე დაიწყო პროკურატურამ ძიება ადიგენის მუნიციპალიტეტის გამგეობის თანამშრომლების მხრიდან სამსახურეობრივი უფლებამოსილების შესაძლო გადამეტების ფაქტზე (სსკ–ის 333–ე მუხლი).

„გირჩში“ აცხადებენ, რომ არჩევნებამდე ოფისებს ასპინძაში, ახალქალაქსა და ნინოწმინდაშიც გახსნიან.

შეგახსენებთ აპც „გირჩმა“ რეგიონული ოფისი ახალციხეში გასული წლის 12 აპრილს გახსნა.

[თამუნა უჩიძე, ახალციხე]