'ერთმანეთის გვერდში დგომით ყველაფერი გამოგვივა' - უფლებადამცველმა ორგანიზაციამ ოფისი ასპინძაშიც გახსნა

ოფისის გახსნის ოფიციალურ ცერემონიას ასპინძის მცხოვრებლებიც ესწრებოდნენ.

„ასპინძელების პრობლემები მოვისმინეთ და მზად ვართ გვერდში დავუდგეთ ამ ადამიანებს. ერთმანეთის გვერდში დგომით ყველაფერი გამოგვივა“, - ამბობს ორგანიზაციის თავმჯდომარე ზურაბ ხუციშვილი.

დღევანდელ შეხვედრაზე ასპინძის მოსახლეობამ სასოფლო-სამეურნეო მიწების პრობლემებზე ისაუბრა. მათი თქმით, დაახლოებით ოთხი წლის წინ ასპინძაში, ბუზმარეთის ტერიტორიაზე მიწები უკანონოდ გასხვისდა.

„წლების წინ, გამგეობის დადგენილებით, 62 ოჯახს დაახლოებით 1 ჰექტრამდე მიწის ფართობები გადმოგვეცა, რომელსაც სათიბად ვიყენებდით 10-15 წლის განმავლობაში. რამდენიმე წლის წინ ჩატარდა აუქციონი, რომლის შესახებაც ჩვენ, მიწის მესაკუთრეებს, არანაირი ინფორმაცია არ გვქონია და გაასხვისეს ეს მიწები, - ამბობს ასპინძაში მცხოვრები როლანდი ნარიმანიძე და ამატებს, რომ აუქციონის შესახებ ინფორმაცია რომ ჰქონოდათ, ამ მიწებს თვითონ შეისყიდიდნენ: ვის აღარ მივმართეთ, მაგრამ არანაირი რეაგირება არ მოჰყოლია. ბოლოს პროკურატურაში საჩივარი შევიტანეთ, დაიწყო ძიება, დაგვკითხეს მაშინვე, მაგრამ იმის მერე ეს საქმე თაროზე შემოიდო და აღარავის არ მოუკითხებია“.

ორგანიზაში ამბობენ, რომ ამ პრობლემით აუცილებლად დაინტერესდებიან.

ასპინძის რაიონულ ორგანიზაციას ნუგზარ ზაქაიძე უხელმძღვანელებს.

„ჩვენი ორგანიზაცია ძირითადად იმუშავებს, უსამართლობაზე, უკანონობაზე, ადამიანის უფლებების დარღვევაზე, ასპინძაში ბევრი უკანონობაა დაფიქსირებული მიწებთან დაკავშირებით, რომელიც უკანონოდ არის გასხვისებული და მოსახლეობა დაზარალდა“, - ამბობს ნუგზარ ზაქაიძე.

ასპინძის შემდეგ, „ადამიანის უფლებათა საყოველთაო დეკლარაციისთვის“ ადიგენის რაიონული ორგანიზაცია გაიხსნება.

„უახლოეს მომავალში დაგეგმილია ახალქალაქისა და ნინოწმინდის რაიონული ორგანიზაციების გახსნაც. ჩვენი მიზანია, იმ ადამიანებს დავუდგეთ გვერდში, ვისაც რაიმე პრობლემა აქვს“, - ამბობს „ადამიანის უფლებათა საყოველთაო დეკლარაციისთვის“ სამცხე-ჯავახეთის რეგიონული კოორდინატორი დავით ბერიძე.

შეგახსენებთ, ორგანიზაცია თბილისში მიმდინარე წლის 17 აპრილს დაფუძნდა. სამცხე-ჯავახეთის რეგიონული წარმომადგნელობა კი 15 მაისს დაასახელეს.

ორგანიზაციაში ამბობენ, რომ მათი ორგანიზაცია 1948 წლის 10 დეკემბერს გაერთიანებული ერების ორგანიზაციის მიერ მიღებულ „ადამიანის უფლებათა საყოველთაო დეკლარაციას“ ეფუძნება და ისინი მზად არიან დახმარება გაუწიონ ყველა იმ ადამიანს, ვინც ფიქრობს, რომ მისი უფლებები ილახება.



[თამარ თოთაძე, ახალციხე]