ახალციხეში „გირჩის“ რეგიონული ოფისი გაიხსნა

„ახალი პოლიტიკური ცენტრის–გირჩის“ რეგიონული ოფისი ახალციხეში, კეცხოველის პირველ ნომერში გაიხსნა.

„ახალი პოლიტიკური ცენტრის–გირჩის“ ხელმძღვანელის ზურაბ ჯაფარიძის თქმით, ისინი ეცდებიან რეგიონში ახალი სახეები მოძებნონ.
„არსი ამ პოლიტიკური ცენტრის არის ის, რომ შევქმნათ პლატფორმა, სადაც ახალ ადამიანებს, ახალი იდეებით მოვიზიდავთ და გაავაქტიურებთ. იმედი მაქვს, რომ ეს ოფისი წარმატებით შეასრულებს ამ ფუნქციას“, – განაცხდა ჯაფარიძემ.

„გირჩის“ ახალციხის წარმომადგენლობას კობა გორგოძე უხელმძღვანელებს.

„ვეცდებით ოფისში მოვიყვანოთ ახალი სახეები, აქცენტი გავაკეთოთ ახალგაზრდებზე. შევისწავლით ხალხის პრობლემებს და ამის შემდეგ დავგეგმავთ შემდგომ მუშაობას“, – ამბობს „ახალი პოლიტიკური ცენტრის–გირჩის“ სამცხე–ჯავახეთის კორდინატორი კობა გორგოძე.

ოფისის გახსნის პარალელურად, „გირჩის“ ხელმძღვანელმა ზურა ჯაფარიძემ ცენტრის მიერ მომზადებული საარჩევნო სისტემის განვითარების ინიციატივაზე ისაუბრა. მისი თქმით, რამდენიმე დღის წინ საპარლამენტო უმრავლესობის მიერ ინიცირებული იქნა საპარლამენტო არჩევნებში მაჟორიტარული მანდატების გადანაწილები ახალი წესი, რითაც ხელისუფლება ცდილობს დაძალაში დატოვოს ერთმანდატიანი მაჟორიტარული არჩევნების მოდელი.

„ეს წესი ვერ აკმაყოფილებს ვერც საერთაშორისო ორგანიზაციების მოთხოვნებს და ვერც საკონსტიტუციო სასამართლოს გადაწყვეტილებას.წარმოდგენილ ვარიანტს აქვს რამოდენიმე არსებითი ხარვეზი. ეს გვაფიქრებინებს, რომ მაჟორიტარული არჩევის წესი ან და არჩეული დეპუტატების ლეგიტიმაცია შესაძლოა დადგეს კითხვის ნიშნის ქვეშ, რაც 2016 წლის არჩევნების მთავარი პრობლემა იქნება“, – აცხადებს ზურა ჯაფარიძე.

ახალი პოლიტიკური ცენტრი "გირჩი" უახლოეს ბიუროს სხდომაზე, საქართველოს პარლამენტში წარადგენს ცვლილებებს საარჩევნო კოდექსში, რომლითაც გათვალიწინებული იქნება კონსტიტუციით დადგენილი მაჟორიტარული მანდატების განაწილების ახალი მოდელი.

"ახალი პოლიტიკური ცენტრი - გირჩი" ოპოზიციური პარტია „ერთიანი ნაციონალური მოძრაობიდან“ წასულმა დეპუტატებმა – ზურაბ ჯაფარიძემ, პავლე კუბლაშვილმა, გოგა ხაჩიძემ და გიორგი მელაძემ შექმნეს.



[თინათინ ზაზაძე, ახალციხე]