ასპინძასა და ადიგენში ენმ–ს ორგანიზაციების ხელმძღვანელები დაინიშნენ

ვიდრე „ნაციონალური მოძრაობა“ მუნიციპალიტეტებში კონფერენციებს გამართავს და ორგანიზაციების ხელმძღვანელებს აირჩევს, რაიონულ ორგანიზაციებში თავმჯდომარის დროებითი მოვალეობის შემსრულებლები დანიშნეს.

„ერთიანი ნაციონალური მოძრაობის“ ასპინძის რაიონულ ორგანიზაციას ასპინძის საკრებულოში ფრაქცია „ნაციონალების“ თავმჯდომარე მალხაზ მოსიძე უხელძღვანელებს. ადიგენში კი იგივე პოზიცია ადიგენის საკრებულოში „ქრისტიან–კონსერვატიული“ ფრაქციის თავმჯდომარემ რატი ტატალაშვილმა ჩაიბარა.

მალხაზ მოსიძე პროფესიით ფილოლოგია. უნივერსიტეტის დასრულების შემდეგ რუსული ენისა და ლიტერატურის პედაგოგად მუშაობდა. 2005 წლიდან 2008 წლამდე სოციალური მომსახურების სააგენტოში იყო დასაქმებული. 2008 წლიდან ბიზნესით დაკავდა. 2010 წლიდან კი ასპინძის მუნიციპალიტეტის გამგეობაში ინფრასტრუქტურის სამსახურის სპეციალისტად დაიწყო მუშაობა. 2014 წლის ადგილობრივი თვითმმართველობის არჩევნების შემდეგ ასპინძის მუნიციპალიტეტის საკრებულოს დეპუტატია „ნაციონალური მოძრაობიდან“.

მისი თქმით, ასპინძაში ფრაქცია, რომელსაც ხელმძღვანელობს, არ დაშლილა. პირიქით, მათ დაემატათ ორი წევრი, რომელიც საკრებულოში „ქრისტიან –კონსერვატიული“ პარტიიდან იყო შესული: „ჯემალ იაკობაძე და რობერტ ნახაპეტიანი „ნაციონალურ მოძრაობაში“ დარჩნენ. ამიტომ ჩვენ შემოგვიერთდნენ და ახლა ფრაქციაში ხუთი წევრი ვართ“.

უცვლელი დარჩა ადიგენის მუნიციპალიტეტის საკრებულოში რატი ტატალაშვილის ფრაქცია „ქრისტიან–კონსერვატორები“.

ტატალაშვილი პროფესიით იურისტია. იგი 2008 წელს ახალციხის არბიტრაჟის დირექტორი იყო. 2009 წელს ნინოწმინდის საბაჟო გამშვებ პუნქტზე, მებაჟედ დაიწყო მუშაობა. აქედან საგადასახადო სამსახურში უფროს ოფიცრად გადავიდა. 2010 წელს კი ადიგენის მუნიციპალიტეტის გამგებლის მოადგილედ დაინიშნა. ეს პოზიცია 2013 წლის სექტემბრამდე ეკავა. 2014 წლის თვითმმართველობის არჩევნების შემდეგ ადიგენის საკრებულოს დეპუტატია.

შეგახსენებთ, რომ ახალციხეში რაიონულ ორგანიზაციას დავით ბალიაშვილი ხელმძღვანელობს, ბორჯომში კი ვახტანგ ქვათაძე. ბალიაშვილს აღნიშნული პოზიცია ერთი კვირის წინ ჩააბარეს. ქვათაძე კი „ნაციონალურ მოძრაობას“ იქამდეც ხელმძღვანელობდა, ვიდრე პარტია ორად გაიყოფოდა.

[თამუნა უჩიძე, ახალციხე]