ქართულის გამოცდაზე ორი პირი ჩაიჭრა

ქართული ენისა და ლიტერატურის გამოცდაზე მეხუთე საჯარო სკოლაში ყველაზე მეტი, 123 მოსწავლე იყო დარეგისტრირებული, მათგან მეთორმეტეკლასელი – 117, დანარჩენი ექვსი კი გასულ წლებში ჩაჭრილი და ექსტერნის ჩაბარების მსურველი ახალგაზრდები იყვნენ.

დარეგისტრირებული მოსწავლეებიდან გამოცდაზე ერთი მათგანი არ გამოცხადდა, ერთმა კი მინიმალური ქულა – 5.5, ვერ გადალახა.
ქულათა საჭირო რაოდენობა ვერ დააგროვა პირველ საჯარო სკოლაში დარეგისტრირებულმა კიდევ ერთმა მოზარდმა.

,,მე–12 კლასელი არ არის, წინა წლებში ვერ დააგროვა საჭირო რაოდენობის ქულები და კიდევ ერთხელ გავიდა გამოცდაზე“, – განმარტავს პირველი საჯარო სკოლის დირექტორი ჟუჟუნა გოგოლაური.

პირველ საჯარო სკოლაში სულ რეგისტრირებული იყო 87 მოსწავლე, მათგან 78 მეთორმეტეკლასელი.

ქალაქ ახალციხეში არსებულ დანარჩენ სკოლებში ბარიერი ყველა მოსწავლემ გადალახა.

გამოცდა ჩააბარეს:

#2 საჯარო სკოლის დამამათვარებელი კლასის 34–მა მოსწავლემ;
#3 საჯარო სკოლაში დარეგისტრირებულმა 40–მა მონაწილემ (2 ექსტერნის მსურველი);
#6 საჯარო სკოლის 18–მა მოსწავლემ;
კერძო სკოლა "მზექას“ 19–მა მოსწავლემ.

ქართული ენისა და ლიტერატურის გამოცდის შემდეგ, მოსწავლეები ტესტირებას კიდევ 3 საგანში: უცხო ენაში, ისტორიასა და მათემატიკაში ჩააბარებენ. გამოსაშვები გამოცდები 25 მაისს დასრულდება.

[თაკო ფეიქრიშვილი, ახალციხე]