საჯარო სკოლებში მე–11 კლასის გამოსაშვები გამოცდები დასრულდა

საჯარო სკოლებში მე–11 კლასის გამოსაშვები გამოცდები 16 ივნისს დაიწყო. მოსწავლეებმა გამოცდა 4 საგანში ქიმიაში, ბიოლოგიაში, ფიზიკასა და გეოგრაფიაში ჩააბარეს.

ახალციხის საჯარო სკოლების დირექტორების თქმით, გამოცდები საშუალო სირთულის იყო.

ახალციხის მეხუთე საჯარო სკოლაში 101 მე–11 კლასელიდან გამოსაშვები გამოცდები ხუთმა ვერ ჩააბარა. ამათგან ერთი სამ საგანში, ხოლო ოთხი ორ საგანში ჩაიჭრა.

33 მე–11 კლასელიდან მხოლოდ ერთი ბავშვი ჩაიჭრა მეორე საჯარო სკოლაში. მან ბარიერი ფიზიკის გამოცდაში ვერ გადალახა.
ხუთ მოსწავლეს გაუჭირდა ბიოლოგიის და ფიზიკის გამოცდის ჩაბარება მესამე საჯარო სკოლაში. 30–მა მე–11 კლასელმა გამოსაშვები გამოცდები წარმატებით ჩააბარეს.

პირველ საჯარო სკოლაში გამოცდაზე 95 მე–11 კლასელი გავიდა, აქედან გამოცდა 6–მა მოსწავლემ ვერ ჩააბარა. ქიმიის გამოცდის ჩაბარება ვერცერთმა ვერ შეძლო. რამდენიმე მოსწავლე კი ფიზიკისა და ბიოლოგიის გამოცდაშიც ჩაიჭრა.

„მე–11 კლასის გამოცდები დაახლოებით ისეთივე სირთულის იყო როგორც მე–12 კლასელების, თუმცა წინა გამოცდებისგან განსხვავებით რამდენიმე მაღალი ქულა დაიწერა“,–ამბობს პირველი საჯარო სკოლის დირექტორი მაკა ჯანაშვილი.

თითოეული საგნის ტესტური დავალებების ბაზა შედგებოდა მარტივი, საშუალო სირთულისა და რთული დავალებების ბლოკებისგან.
მოსწავლე, რომელიც რომელიმე საგანში მინიმალური კომპეტენციის ზღვარს ვერ გადალახავს, აღნიშნულ გამოცდას მომდევნო წელს, მე-12 კლასის დასრულებისას, დანარჩენ 4 გამოცდასთან ერთად ჩააბარებს.

[მანანა სარაშვილი, ახალციხე]