რამდენი მოსწავლე ჩაიჭრა მათემატიკასა და ფიზიკაში ახალციხის სკოლებში

23 მაისს, გამოცდა მათემატიკაში იმ მე–12 კლასელებმა ჩააბარეს, რომლებმაც სკოლა წელს დაამთავრეს, ფიზიკაში კი გამოცდაზე გასულ წელს ჩაჭრილები გავიდნენ. ორივე გამოცდაში ერთად 25 კურსდამთავრებული ჩაიჭრა.

„მათემატიკის გამოცდა საკმაოდ მარტივი იყო. სისტემები, ორუცნობიანი განტოლებები, სინუს–კოსინუსები, ეს ყველაფერი კარგად ვიცი და არც ჩაბარება გამჭირვებია“, – ამბობს კერძო სკოლა „მზექას“ მე–12 კლასელი ბადრი შუბითიძე.

მისგან განსხვავებით გეომეტრიიდან მოსულ საკითხებზე პასუხების გაცემა გაუჭირდა მეხუთე სკოლის მე–12 კლასელს ლიზა კაპანაძეს: „ძალიან ვნერვიულონდი, რადგან გეომეტრია კარგად არ ვიცი, თუმცა, ბარიერი გადავლახე და მიხარია“.

მე–12 კლასელებმა გამოცდების ჩაბარება მათემატიკის გამოცდით დაასრულეს. დღეს, 24 მაისს გამოცდას ქიმიაში ის მოსწავლეები აბარებენ, რომლებიც გასულ წელს, მეთერთმეტე კლასში ყოფნის დროს ქიმიის გამოცდაში ჩაიჭრნენ.



N1 საჯარო სკოლაში 91 კურსდამთავრებულიდან სამი ჩაიჭრა.

N2 საჯარო სკოლაში 37–დან ბარიერი მხოლოდ ერთმა ვერ გადალახა.

N3 საჯარო სკოლაში 62 მოსწავლიდან ათი ჩაიჭრა.

N5 საჯარო სკოლაში 110 კურსდამთავრებულიდან ბარიერი 10–მა ვერ გადალახა.

N6 საჯარო სკოლაში 31–დან ბარიერი მხოლოდ ერთმა ვერ გადალახა.

კერძო სკოლა „მზექას“ 14–ვე კურსდამთავრებულმა გამოცდა ჩააბარა.

[მარიამ ბარძიმაძე, ახალციხე]