დღეს სკოლის გამოსაშვები გამოცდები მოსწავლეებმა ისტორიასა და ფიზიკაში ჩააბარეს

ისტორიის გამოცდაზე ყველა მეთორმეტე კლასელი გავიდა, ხოლო ფიზიკა იმ მოსწავლეებმა ჩააბარეს, რომლებიც წინა წელს ჩაიჭრნენ.

ქალაქის ექვს სკოლაში გამოცდაში შვიდი მოსწავლე ჩაიჭრა.

„ისტორიაში დიდი მასალაა და არ იყო ადვილი ჩასაბარებელი. მოცემული იყო ქრონოლოგიები, ასევე მოვლენა და უნდა განგვესაზღვრა ვის ეხებოდა და რომელ პერიოდში მოხდა. ვფიქრობ, რომ თუ მასწავლებელს უსმენდი და თუ ერთხელ მაინც წაგიკითხავს,ბარიერს გადალახავდი“,–ამბობს მეხუთე საჯარო სკოლის მე–12 კლასის მოსწავლე ანა გეწაძე.

ბარიერის გადალახვა არ გაჭირვებია მარიამ დევნოსაძესაც: "09:00 საათზე შევედი და ძალინ ვნერვიულობდი, თუმცა ვფიქრობ, რომ ნორმალურად დავწერე. საშუალო სირთულის იყო. კითხვები ძირითადად უახლესი ისტორიიდან შემხვდა“.

ორივე გამოცდის შედეგი ქალაქის სკოლებში ასეთია:

N1 საჯარო სკოლაში ბარიერი გამსვლელმა 83–ვე კურსდამთავრებულმა გადალახა;
N2 საჯარო სკოლაში 37 მონაწილედან მხოლოდ ორი ჩაიჭრა;
N3 საჯარო სკოლაში 77–დან მხოლოდ 2 ჩაიჭრა;
N5 საჯარო სკოლაში 97 მონაწილედან ბარიერი სამმა ვერ გადალახა;
N6 საჯარო სკოლაში 31–დან მხოლოდ ერთი ჩაიჭრა;
„მზექას“ კერძო სკოლაში 14–ვე კურსდამთავრებულმა გადალახა ბარიერი;

ხვალ, 23 მაისს მე–12 კლასელები გამოსაშვებ გამოცდას მათემატიკასა და ფიზიკაში ჩააბარებენ.

[მარიამ ბარძიმაძე, ახალციხე]