ახალციხეში 284 მეთორმეტეკლასელიდან გამოსაშვები გამოცდა 25–მა ვერ ჩააბარა

საჯარო სკოლებში გამოსაშვები გამოცდები მიმდინარე წლის 21 მაისს ქართული ენისა და ლიტერატურის გამოცდით დაიწყო და 24 მაისს მათემატიკის გამოცდით დასრულდა. 22 და 23 მაისს მეთორმეტეკლასელებმა გამოცდა უცხო ენასა და ისტორიაში ჩააბარეს.

ახალციხის საჯარო სკოლის დირექტორების თქმით, გამოცდები საშუალო სირთულის იყო.

ახალციხის მეექსვე საჯარო სკოლაში 26 მეთორმეტეკლასელიდან გამოსაშვები გამოცდები მხოლოდ ერთმა ვერ ჩააბარა.

ორ მოსწავლეს გაუჭირდა ქართულის ენისა და ლიტერატურის, ასევე ისტორიის გამოცდის ჩაბარება მეორე საჯარო სკოლაში. 26–მა მეთორმეტეკლასელმა კი გამოსაშვები გამოცდა წარმატებით ჩააბარა.

ახალციხის პირველ საჯარო სკოლაში გამოცდაზე 85 მეთორმეტეკლასელი გავიდა, აქედან ატსეტატს 6 მოსწავლე ვერ აიღებს.

„6 ბავშვიდან სამი იყო ისეთი, რომლებსაც მხოლოდ ერთი გამოცდის ჩაბარება გაუჭირდათ, დანარჩენ სამს კი რამდენიმე საგანის“,–ამბობს პირველი საჯარო სკოლის დირექტორი მაკა ჯანაშვილი.

მესამე საჯარო სკოლის 38 მეთორმეტეკლასელიდან 5–მა მოსწავლემ ქიმიის, რუსულის და მათემატიკის გამოცდა ვერ ჩააბარა.

რაც შეეხება ახალციხის მეხუთე საჯარო სკოლას, აქ გამოსაშვებ გამოცდებზე 92 მოსწავლე გავიდა, თუმცა 11–მა მათგანმა გამოცდები ვერ ჩააბარა. როგორც სკოლის დირექტორის მოვალეობის შემსრულებელი ინგა ვარდიძე ამბობს, მეთორმეტეკლასელებს ძირითადად ისტორიის გამოცდის ჩაბარება გაუჭირდათ.

ამავე სკოლაში დამამთავრებელი კლასის გამოცდები სოფელ კლდის საჯარო სკოლის 12–მა მეთორმეტეკლასელმაც ჩააბარეს, აქედან 4–მა მოსწავლემ საჭირო ქულების რაოდენობა ვერ დააგროვა.

კერძო სკოლა „მზექაში“ 17 მეთორმეტეკლასელიდან გამოსაშვები გამოცდები ყველამ წარმატებით ჩააბარა.

შეგახსენებთ, რომ გამოსაშვები გამოცდები საჯარო სკოლებში ოთხი დღის განმავლობაში მიმდინარეობდა და მას საქართველოს განათლებისა და მეცნიერების სამინისტროს წარმომადგენლები აკვირდებოდნენ.

[მანანა სარაშვილი, ახალციხე]