სკოლებში გამოსაშვები გამოცდები მიმდინარეობს

ახალციხის საჯარო სკოლების დირექტორები ამბობენ, რომ უფროსკლასელებს გამოცდების ჩაბარება არ უჭირთ.

ახალციხის მეხუთე საჯარო სკოლაში დამამთავრებელი კლასის გამოცდებს 92 მოსწავლე აბარებს. ამათგან, ქართული ენისა და ლიტერატურის გამოცდა ორმა ვერ ჩააბარა, უცხო ენის გამოცდა კი ერთმა.

ორ მოსწავლეს გაუჭირდა ქართულის გამოცდა ახალციხის მეორე საჯარო სკოლაში. უცხო ენა კი ყველამ წარმატებით ჩააბარა.

სამ მოსწავლეს გაუჭირდა ქართული ენისა და ლიტერატურის გამოცდა ახალციხის პირველ საჯარო სკოლაში, სადაც 85 მეთორმეტეკლასელია. „უცხო ენის გამოცდის შედეგები კი ჯერ ცნობილი არ არის“, - ამბობს პირველი საჯარო სკოლის დირექტორი მაკა ჯანაშვილი.

მეექვსე საჯარო სკოლაში, დირექტორის, ზაზა თამარაშვილის თქმით, მოსწავლეებს არცერთი გამოცდის ჩაბარება არ გასჭირვებიათ.
ორივე საგანში წარმატებით ჩააბარეს გამოცდები ახალციხის მესამე საჯარო სკოლის მეთორმეტეკლასელებმაც.

შეგახსენებთ, რომ 2014 წლის სკოლის გამოსაშვები გამოცდები გუშინ, 21 მაისს ქართული ენისა და ლიტერატურის გამოცდით დაიწყო. დღეს გამოცდა უცხო ენაში ჩატარდა. ხვალ, 23 მაისს მეთორმეტეკლასელები გამოცდას ისტორიაში ჩააბარებენ, 24 მაისს კი სკოლის გამოსაშვები გამოცდები მათემატიკის გამოცდით დასრულდება.

გამოსაშვები გამოცდები საჯარო სკოლებში ტარდება და მას განათლებისა და მეცნიერების სამინისტროს წარმომადგენლები აკვირდებიან.

[მანანა სარაშვილი, ახალციხე]