მთავარი → საზოგადოება16.05.2016ქალაქიდან შორს, სასმელი წყლის, გზისა და საზოგადოებრივი ტრანსპორტის გარეშე – ახალციხეში მცხოვრებ დევნილებს ბინები მისცეს, თუმცა, მათი ცხოვრება ამით არ გაუმჯობესებულა.
ირმა ჩაკაბერია აფხაზეთიდან 23 წლის წინ წამოვიდა. ახლა მეუღლესთან და ორ მცირეწლოვან შვილთან ერთად ახალციხის გარეუბანში, ახალგარემონტებულ შენობაში, ცხოვრობს. ირმა აქ საცხოვრებლად დაახლოებით ორი თვის წინ გადმოვიდა. ამბობს, რომ მთავრობამ მათ წინაშე აღებული პასუხისმგებლობა ცარიელი ბინის გადაცემით მოიხადა. შენობაში არც გათბობაა და არც სასმელი წყალი.
„თავბედს ვიწყევლი, რატომ გადმოვედი–მეთქი“, – გვეუბნება ირმა.
ირმა ერთ–ერთია იმ 26 ოჯახიდან, რომლებიც ამ შენობაში აგასული, 2015 წლის მიწურულს, დეკემბერში, საზეიმოდ შეასახლეს. დევნილებს ბინის გასაღები თავად საქართველოს ლტოლვილთა და განსახლების მინისტრმა სოზარ სუბარმა გადასცა.
შენობაში ყველა ჯერ არ შესახლებულა. ირმა ამბობს, რომ პირობების არქონის გამო, ბევრი არ გადმოსვლისგან თავს იკავებს.
ახალციხის მუნიციპალიტეტში საქართველოს ოკუპირებული ტერიტორიებიდან დევნილი 79 ოჯახია რეგისტრირებული. ამათგან, საცხოვრებელი ფართი მხოლოდ 17–ს აქვს დაკანონებული. დანარჩენები ქირით ან სხვადასხვა მიტოვებულ შენობებში ცხოვრობენ.
სწორედ მათთვის გაარემონტა სამინისტრომ ახალციხეში, რუსთაველის 113–ში მდებარე, ყოფილი სკოლა–ინტერნატის შენობა. ორ, სამსართულიან კორპუსში, 66 საცხოვრებელი ბინა გაკეთდა: 13-ერთოთახიანი, 32-ოროთახიანი და 21-სამოთახიანი. სამუშაოები 763 983 ლარი დაჯდა.
2015 წლის 19 დეკემბერს ახალგარემონტებულ კორპუსში 26 ოჯახი შეასახლეს. გარდა ამისა, აქ ცხოვრობს 7 ოჯახიც, რომლებიც ამ ფართში ჯერ კიდევ მაშინ გადავიდნენ საცხოვრებლად, ვიდრე შენობის რემონტი დაიწყებოდა.
ირმა ჩაკაბერია ამბობს, რომ ამ დასახლების ერთ–ერთი მთავარი პრობლემა სასმელი წყლის არქონაა. აქ მცხოვრებლებს წყლის ზიდვა ყოველდღე ხელით უწევთ.
დევნილების კორპუსი სასმელი წყლით ელექტროსაქაჩის საშუალებით მარაგდება. აქ მაცხოვრებლები ამბობენ, რომ შესახლებისას, პირველი ათი დღის განმავლობაში, უწყლობას არ უჩიოდნენ, თუმცა შემდეგ რამდენიმე პრობლემა გაჩნდა. ელექტორენერგიის საფასური, რომელიც საქაჩის მუშაობის შედეგად დაგროვდა, ვერ გადაიხადეს და წყლის მომარაგება შეუწყდათ. მას შემდეგ კი, რაც იძულებით გადაადგილებულ პირთა, განსახლებისა და ლტოლვილთა სამინისტრომ თანხა აანაზღაურა, სამი საქაჩიდან ერთი მწყობრიდან გამოვიდა.
უწყლობის გარდა რუსთაველის 113–ის ბინადრები, უგზობასაც უჩივიან. ამბობენ, რომ მათი კორპუსი ქალაქიდან საკმაოდ შორს არის, მოუწესრიგებელია მისასვლელი გზა და არ დადის საზოგადოებრივი ტრანსპორტი.
„რომ იწვიმებს, აქ ეშმაკი ვერ ამოვა“, – გვეუბნება იოსებ ბაშენკო.
მოუწესრიგებელი გზა და საზოგადოებრივი ტრანსპორტის არ ქონა, აქ მცხოვრებლებს განსაკუთრებით იმიტომ აწუხებთ, რომ ახლომახლო არ არის სავაჭრო პუნქტი, სადაც პურს ან საკვებ პროდუქტებს შეიძენენ. ოჯახის მოსამარაგებლად მათ ქალაქის ცენტრამდე რამდენიმე კილომეტრის გავლა უწევთ.
ამ ყველაფერს დასუფთავების პრობლემები ემატება. თვენახევრის წინ, 30 მარტს „სამხრეთის კარიბჭემ“ დასახლების მისასსვლელში გადავსებული ძველ, ჯანგმოდებული ნაგვის ბუნკერები და ნარჩენებით მოფენილი ტერტორია გადაიღო.
ფოტოს გამოქვეყნებიდან რამდენიმე დღეში, შპს „კეთილმოწყობის“ სამსახურმა, რომელიც ახალციხის დასუფთავებაზეა პასუხისმგებელი, დევნილებს ორი ახალი ნაგვის ურნა აუტანა.
აქაურებს ახალი და მეტი ნაგვის ურნა მოწონთ, თუმცა, ამბობენ, რომ აბუნკერებს ხშირად თუ არ დაცლიან, ამით მათ ცხოვრებაში არაფერი შეიცვლება.
მართალია შენობა დევნილებისთვის ლტოლვილთა სამინისტრომ გაარემონტა, მაგრამ, დევნილთა დასახლებაში მისასვლელი გზის, გარე განათების, საზოგადოებრივი ტრანსპორტისა და დასუფთავების საკითხების მოგვარება ქალაქ ახალციხის მერიას ევალება. მერიის საზოგადოებასთან ურთიერთობის სამსახურში "სამხრეთის კარიბჭეს“ განუმარტეს, რომ ამ ეტაპზე ე.წ. დევნილთა დასახლებაში არაფერი იგეგმება.
რაც შეეხება წყლის პრობლემას, მისი მოგვარება იძულებით გადაადგილებულ პირთა, განსახლებისა და ლტოლვილთა სამინისტროს კომპეტენციაა. საქართველოს ლტოლვილთა და განსახლების სამინისტროს შიდა ქართლისა და სამცხე – ჯავახეთის ტერიტორიული ორგანოს უფროსის თამაზ გვიმრაძის თქმით, სამინისტრომ საქაჩის მუშაობის შედეგად დახარჯული ელექტროენერგიის საფასური უკვე ორჯერ გადაიხადა.
"სამინისტრო დაუსრულებლად ვერ გადაიხდის თანხას, პირველად 300, მეორედ 400 ლარი უკვე ჩაირიცხა. ახლა ერთი "მატორია" დამწვარი. ამ ეტაპზე, სამინისტრო დაავალებს წყალმომარაგების კომპანიას, რომ მდგომარეობა შეისწავლოს“, – ამბობს გვიმრაძე.
როდის მოგვარდება სასმელი წყლის პრობლემა, თამაზ გვიმრაძეს კონკრეტული თარიღის დასახელება უჭირს. კონკრეტული დაპირებები არ ჩანს არც ახალციხის მერიისგან.
„საცხოვრებლის გადმოცემა არ ნიშნავს, რომ ყველაფერი კარგადაა“, – ამბობენ რუსთაველის 1130ის ბინადრები და ერთადერთი იმედი რჩებათ, მოახლოებული არჩევნები.