ახალციხეში დევნილებისთვის ბინების განაწილების პროცესი მეორედ გადაიდო

დევნილებისთვის ახალციხეში საცხოვრებელი ბინების გადაცემის პროცესი მეორედ გადაიდო. ახალციხეში რუსთაველის N113 – ში მდებარე ყოფილი სკოლა-ინტერნატის შენობის რეაბილიტაცია ჯერ არ დასრულებულა.

საქართველოს ლტოლვილთა და განსახლების სამინისტროს შიდა ქართლისა და სამცხე – ჯავახეთის ტერიტორიული ორგანოს უფროსის თამაზ გვიმრაძის თქმით, მშენებელ კომპანიას, რომელიც დევნილებისთვის საცხოვრებელ ბინებს არემონტებს შენობის რეკონსტრუქციის ვადა თვის ბოლომდე გაუხანგრძლივდა.

შენობის რეაბილიტაციის დასრულების შემდეგ, დევნილთა სამინისტრო იძულებით გადაადგილებულ პირებისთვის ბინების განაწილების პროცესს დაიწყებს.

„საცხოვრებელი ფართის განაწილების პროცესს დეკემბერში დავიწყებთ“, – ამბობს თამაზ გვიმრაძე.

შეგახსენებთ, რომ ახალციხეში ყოფილი სკოლა-ინტერნატის შენობის რეაბილიტაცია მიმდინარე წლის 4 აპრილს დაიწყო და მიმდინარე წლის სექტემბერში უნდა დასრულებულიყო, თუმცა მშენებელმა კომპანიამ შპს „სენმა“ შენობის რეკონსტრუქცია დადგენილ ვადებში ვერ დაასრულა. მშენებელ კომპანიას ობიექტი ნოემბრის შუა რიცხვებში უნდა დაესრულებინა.

ახალციხეში დევნილებისთვის ორ სამსართულიან კორპუსში ერთოთახიანი, ოროთახიანი და სამოთახიანი 66 საცხოვრებელი ბინა კეთდება.

[მანანა სარაშვილი, ახალციხე]