დევნილები ახალციხეში ბინებს მარტში მიიღებენ

ბინების გადაცემა ბორჯომში მცხოვრები დევნილებისთვის. 21 ნოემბერი, 2014/ "ს.კ"–ს ფოტო

ახალციხეში, რუსთაველის N113 – ში მდებარე ყოფილი სკოლა – ინტერნატის შენობის რეაბილიტაცია, რომელიც დევნილებისთვის გაკეთდა, უკვე დასრულდა.

საქართველოს ოკუპირებული ტერიტორიებიდან, იძულებით გადაადგილებულ პირთა, განსახლებისა და ლტოლვილთა სამინისტროში განმარტავენ, რომ დევნილები ბინებს მარტში მიიღებენ.

„შენობის რეაბილიტაცია დასრულებულია, ამ ეტაპზე მხოლოდ ტექნიკური დეტალებია დარჩენილი. განაცხადები უკვე მიღებულია, რომელსაც შესაბამისი კომისია სწავლობს. სავარაუდოდ მარტის 10 რიცხვამდე პირველად მონაცემებს გამოვაქვეყნებთ, რის შემდეგადაც უკვე ზუსტ სიას დავდებთ“, – ამბობს საქართველოს ოკუპირებული ტერიტორიებიდან, იძულებით გადაადგილებულ პირთა, განსახლებისა და ლტოლვილთა სამინისტროს საზოგადოებასთან ურთიერთობის სამსახურის წარმომადგენელი დალი გოგოლაძე.

შეგახსენებთ, რომ დევნილებისთვის ორ სამსართულიან კორპუსში ერთოთახიანი, ოროთახიანი და სამოთახიანი 66 საცხოვრებელი ბინა გაკეთდა.

[მანანა სარაშვილი, ახალციხე]