ახალციხეში დევნილებს ბინები გადაეცათ

65 წლის ავთანდილ მუზაშვილი, რომელიც სოხუმში ბირცხას დასახლებაში სიკვდილს შემთხვევით გადაურჩა, 23 წელია ახალციხეში, სოფელ ელიაწმინდაში ნახევრად დანგრეულ ბინაში ცხოვრობს. დღეიდან კი მეუღლესთან ერთად ახალგარემონტებულ ბინაში გადავა. ამბობს, რომ სოფელს შეჩვეული ქალაქში საცხოვრებლად გადასვლა არ გაუჭირდება.

„სოხუმიდან ზოგი „პერევალზე“ გადმოვიდა, ზოგიც გემით წამოვიდა. მას შემდეგ გაუსაძლის პირობებში გვიწევდა ცხოვრება, დღეს მთავრობის მადლობლები ვართ“, – ამბობს მუზაშვილი.

ახლობლის ოროთახიანი ბინა დატოვა დღეს ორი მცირეწლოვანი შვილის დედამ ირმა ჩაკაბერიამაც. მუზაშვილის მსგავსად მას ავარიულში არა, თუმცა სივიწროვის გამო გაუსაძლის პირობებში უხდებოდა ცხოვრება: „აქამდე ნათესავთან ვცხოვრობდით, დღეს გასაღები გადმოგვცეს. ძალიან ბედნიერი ვარ“.

23 წელი სხვა დევნილებთან ერთად ბინის მიღებას ელოდა სოფელ ტყემლანაში, ასევე ავარიულ ბინაში მცხოვრები ლილი დალალიშვილიც. თუმცა იმის გამო, რომ შეუძლოდაა, დღეს გასაღების გადაცემის პროცედურას ვერ დაესწრო. თუმცა, ამბობს, რომ ძალიან ბედნიერია და გული წყდება რომ ამ დღეს ახალციხეში ვერ ჩამოვიდა. გასაღები მის შვილს შორენა კაპანაძეს გადაეცა.

დევნილებს ბინები ახალციხეში, რუსთაველის ქ. N113 სამინისტროს მიერ რეაბილიტირებულ შენობაში გადაეცათ. აქ სულ 66 ბინაა: 13-ერთოთახიანი, 32-ოროთახიანი და 21-სამოთახიანი.

დღეს, 19 დეკემბერს ახალმოსახლეობა 26 ოჯახმა იზეიმა. მათ გარემონტებულ კორპუსში 7 ოჯახი უკვე დახვდათ. ეს ოჯახები აქ ჯერ კიდევ მანამდე ცხოვრობდნენ ვიდრე სარემონტო სამუშაოები დაიწყებოდა.

როგროც საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრი სოზარ სუბარი ამბობს ბინების გადაცემის პროცესი დროში ცოტა გაჭიანურდა.

„არ გვინდოდა, რომ ნახევარფაბრიკატები ჩაგბარებოდათ. გვინდოდა რომ ყველა კმაყოფილი ყოფილიყავით“, – უთხრა მინისტრმა ახალგარემონტებული კორპუსის ეზოში შეკრებილებს.

მან კორპუსი დაათვალიერა და დევნილებს ახალმოსახლეობა მიულოცა. მინისტრს თან ახალციხის ადგილობრივი თვითმმართველობის წარმომადგენლები ახლდნენ.

როგორც ახალციხის მერი გიორგი კოპაძე აცხადებს, ამ ტერიტორიასა და აქ მაცხოვრებლებზე ზრუნვას მერია დღეიდანვე იწყებს: „აქ გზასაც გავაკეთებთ“.

შენობის სარეაბილიტაციო სამუშაოები ტენდერში გამარჯვებულმა კომპანიამ შპს „სენმა“ განახორციელა. პროექტის სატენდერო ღირებულებამ 763 983 ლარი შეადგინა.

[თამუნა უჩიძე, ახალციხე]