დევნილების ნაწილმა ახალციხეში ბინა ვერ მიიღო

დღეს, 19 დეკემბერს დილიდან ახალციხეში, რუსთაველის N113–ში მდებარე კორპუსის ეზოში ახალმოსახლეებთან ერთად ის დევნილებიც შეიკრიბნენ, რომლებმაც ბინა ვერ მიიღეს.

„აძინაცატებში“ ვცხოვრობ დანგრეულ ბინაში არც კანალიზაცია და არც წყალია შიგ. ოჯახში 11 სული ვართ, დროებით შვილები სხვაგან ცხოვრობენ. გალში ათი ოთახი მქონდა, მაგრამ დავყარეთ ყველაფერი და წამოვედით, იმის მერე ასე გაუსაძლის პირობებში ვართ “, – ვერ იკავებს ცრემლებს ეკატერინე ფეიქრიშვილი.

დღეს, მის მსგავსად ბინა ვერც ნუგზარ დიასამიძემ მიიღო: „მთავრობა არ გვყავს! მიხსნის ვინმე როდის შეიძლება მოგვცენ ბინა?! ნაქირავებ ბინაში ვცხოვრობ ახალციხეში, იქნებ მაქვს საშუალება და 300 ლარს ვიხდი ქირას, მაგრამ ეს ხომ იმას არ ნიშნავს, რომ ბინა არ მეკუთვნის?!“

ამ დროდმე ელოდება ბინის მიღებას გურამ ლომიძეც: „ამ მთავრობას თავს ვწირავდით, მოვიყვანეთ ხელისუფლების სათავეში და ასე უკანონოდ უნდა მოგვექცენ ახლა?! ბინას არ გვაძლევენ, ვინ არის ჩარეული ამ ამბავში და რატომ ხდება ასე არ ვიცი. არადა თავისუფალი გარემონტებული ბინები არის, კანონითაც გვეკუთვნის მაგრამ უარს გვეუბნებიან“.

ახალგარემონტებულ, ორ სამსართულიან კორპუსში თავისუფალი მართლაც 30–მდე ბინაა. იმ დევნილების ოდენობა კი, რომლებმაც დღეს გასაღებები ვერ მიიღეს, 40–მდეა.

როგროც საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრი სოზარ სუბარი ამბობს, 66 გარემონტებული ბინა პირველ რიგში იმ დევნილებზე განაწილდა, რომლებიც სოციალურად გაჭირვებულები არიან: „ადამიანები, რომლებსაც სახლები აქვთ, მართალია საკუთარი შრომით შეძენილი მაგრამ მაინც აქვთ, ვფიქრობთ, რომ ამ ეტაპზე არ დავაკმაყოფილოთ. ასე რომ თამამად შემიძლია ვთქვა: დღეს ახალციხეში არ დარჩა არცერთი დავენილი ოჯახი რომელსაც ბინა არ აქვს“.

სუბარის განცხადებით, ბინა იმ დევნილ ოჯახებსაც ეკუთვნით, რომლებმაც დღეს ვერ მიიღეს, თუმცა მათი დაკმაყოფილება ეტაპობრივად მოხდება, მაგრამ როდის დაიწყება მათთვის ბინების გადაცემის მეორე ეტაპი, ამბობს რომ არ იცის: „მომდევნო წლებში“.

ლტოლვილთა და განსახლების სამინისტროში განმარტავენ, რომ კომისია თითოეული ასეთი ოჯხის საქმეს შეისწავლის და მათ დაკმაყოფილებაზე იზრუნებენ.

"მონიტორინგი ჩატარებული გვაქვს. შესაძლოა მათთან სხვადასხვა შეთავაზებები გვქონდეს, მაგალითად სახლის აშენება სხვაგან", – ამბობენ აღნიშნული სამინისტროს პრესსამსახურში.

შეგახსენებთ, ახალციხეში სოზარ სუბარმა ახალგარემონტებულ კორპუსში საცხოვრებლად დევნილებს გასაღებები თავად გადასცა. რუსთაველის N113–ში 26 ოჯახი შეასახლეს. აქ სულ 66 ბინაა: 13-ერთოთახიანი, 32-ოროთახიანი და 21-სამოთახიანი.

[თამუნა უჩიძე, ახალციხე]