ახალციხეში რეგისტრირებული დევნილებისთვის ახალი საცხოვრებელი კეთდება

რუსთაველის 113-ში მდებარე, ყოფილი სკოლა ინტერნატის შენობის რეაბილიტაცია 4 აპრილს დაიწყო. სამუშაოებზე ტენდერი საქართველოს ოკუპირებული ტერიტორიებიდან იძულებით გადაადგილებულ პირთა, დევნილთა და განსახლების სამინისტრომ გამოაცხადა. ტენდერში 700 ათასი ლარით შპს „სენმა“ გაიმარჯვა, რომელიც უკვე ერთი თვეა ყოფილი სკოლა ინტერნატის ორ კორპუსში სამშენებლო სამუშაოებს აწარმოებს. მშენებლობაზე 40-მდე ადამიანია დასაქმებული.

როგორც შპს „სენის“ სამუშაოთა მწარმოებელი ბეჟან აბულაძე ამბობს, ობიექტზე ძირითადად ის დევნილები არიან დასქმებული, რომლებიც ყოფილი სკოლა ინტერნატის შენობაში იცხოვრებენ.

„ორი კვირა შენობის დემონტაჟს მოვუნდით, მოვანგრიეთ კედლები, ამოვიღეთ კარ-ფანჯარა. ახლა უკვე სამშენებლო სამუშაოები მიმდინარეობს. იცვლება ორივე კორპუსის სახურავი, კარ-ფანჯარა, გაილესება და შეიღებება კედლები, ჭერი, ფასადი. დაიგება იატაკი, მოწესრიგდება სველი წერტილები და მოპირკეთდება ეზო“, - ამბობს იგი.

მისივე თქმით, დევნილებს ახალ საცხოვრებელ ბინაში ავეჯის გარდა ყველაფერი მზად დახვდებათ: „როგორც ვიცი, შენობაში გაზის შეყვანაც იგეგმება. თუმცა, ეს ჩვენს კომპეტენციაში არ შედის“.

საქართველოს ლტოლვილთა და განსახლების სამინისტროს შიდა ქართლისა და სამცხე-ჯავახეთის ტერიტორიული ორგანოს უფროსის მოვალეობის შემსრულებლის თამაზ გვიმრაძის თქმით, ორ სამსართულიან კორპუსში, რეკონსტრუქციის შედეგად, ერთოთახიანი, ოროთახიანი და სამოთახიანი 66 საცხოვრებელი ბინა გაკეთდება: „საცხოვრებელი ფართით ის ოჯახები დაკმაყოფილდებიან, რომლებსაც ბინები საკუთრებაში არ აქვთ. მათ სპეციალური აპლიკაციების შევსება მოუწევთ, რა დროსაც გარკვეული ქულები უნდა დააგროვონ“.
ამჟამად ყოფილ სკოლა ინტერნატის შენობაში 6 დევნილი ოჯახი ცხოვრობს. ის, რომ სექტემბრიდან ახლადგარემონტებულ ბინებში მოუწევთ ცხოვრება, მოსწონთ.

„გაგრიდან ვარ, უკვე 20 წელია ამ შენობაში, სამოთახიან ბინაში ვცხოვრობ. ვერც კი წარმოვიდგენდი, რომ ოდესმე კომფორტულ ბინაში ვიცხოვრებდი“, - ამბობს ზურაბ ხარშილაძე.

ყოფილი სკოლა ინტერნატის რეაბილიტაცია მიმდინარე წლის სექტემბერში დასრულდება.



[მანანა სარაშვილი, ახალციხე]