სოფლის რწმუნებულებმა თანამდებობები დატოვეს

გამგებლისა და მისი მოადგილეების დანიშვნის შემდეგ, ადგილობრივ ხელისუფლებაში საკადრო ცვლილებები გრძელდება. ამჯერად ცვლილება ახალციხის მუნიციპალიტეტში არსებული ტერიტორიული ორგანოების რწმუნებულებს შეეხოთ. ბეგლარ კაპანაძემ, მალხაზ ინდუაშვილმა და ტარიელ ტაბატაძემ გადადგომის შესახებ განცხადებები დღეს დაწერეს.

სამივე რწმუნებული აცხადებს, რომ თანამდებობიდან წასვლის შესახებ გადაწყვეტილება ქვეყანაში მიმდინარე პოლიტიკური ცვლილებების გამო გადაწყვიტა.

”რამდენიმე კანდიდატურა გვყავს და მათთან მიმდინარეობს კონსულტაციები. პირველ რიგში ხალხის აზრს ვითვალისწინებთ.აქტიურად ვთანამშრომლობთ მათთან და მათი აზრის გათვალისწინებით წარვადგენთ მისაღებ კანდიდატურას, რომელიც იქნება პროფესიონალი და სანდო ადამიანი ”, - განაცხადა ახალციხის მუნიციპალიტეტის გამგებლის მოვალეობის შემსრულებელმა ბესიკ ხითარიშვილმა.

მისივე თქმით, საკადრო ცვლილებები მომავალშიც გაგრძელდება. ამ ეტაპზე ცნობილია, რომ შეიცვლება გამგებლის მოადგილეც, რომელიც სოფლის მეურნეობის, კულტურის და განათლების მიმართულებით მუშაობდა. ზაზა ხუციშვილი აღნიშნულ თანამდებობაზე რამდენიმე დღის წინ დაინიშნა, თუმცა აუხლოეს მომავალში იგი სოფლის მეურნეობის სამსახურის ხელმძღვანელად გადაინაცვლებს. მის ადგილს კი ეროვნებით სომეხი პიროვნება დაიკავებს. ბესიკ ხითარიშვილის განმარტებით, იმის გამო, რომ ახალციხის მუნიციპალიტეტის მოსახლეობის 40 პროცენტი ეთნიკურად სომეხია, გამგებლის ერთ-ერთი მოადგილე ამ ეროვნების უნდა იყოს.

”მიმდინარეობს კონსულტაციები კონკრეტულ პიროვნებებთან და უახლოეს დღეებში გახდება მისი ვინაობა ცნობილი”, - ამბობს ბესიკ ხითარიშვილი.

[თამარ თოთაძე, ახალციხე]