16 რწმუნებულიდან 12 შეიცვალა

ახალციხის მუნიციპალიტეტის გამგებლის მოვალეობის შემსრულებლის ბესიკ ხითარიშვილის განმარტებით რწმუნებულები დროებით მოვალეობის შემსრულებლებად დაინიშნენ. მათ ერთიდან სამ თვემდე გამოსაცდელი ვადა მიეცათ.

- ”კონკურსის გამოცხადებმადე ეს ადამიანები იმუშავებენ აღნიშნულ თანამდებობებზე”, - განმარტავს ხითარიშვილი.

მისივე თქმით, რწმუნებულებმა თანამდებობები პირადი განცხადების საფუძველზე დატოვეს. ახალი რწმუნებულების დანიშვნა კი მოსახლეობასთან კონსულტაციების შემდეგ მოხდა.

- ”სამსახურიდან არავინ გამიშვია. პირადი განცხადებების საფუძველზე დატოვეს თანამდებობები. ხოლო, რაც შეეხება იმ ოთხ რწმუნებულს, საკმაოდ კარგი რეპუტაციით სარგებლობენ და საქმესაც აკეთებენ”, - ამბობს გამგებლის მოვალეობის შემსრულებელი.

კარლენ კარახანიანი, მატრუნ პეტროსიანი, პეტროს ვართანიანი და მანანა მოსიძე თანამდებობებზე ძველებურად რჩებიან.

ცვლილებების თანახმად ახალციხის მუნიციპალიტეტის გამგეობის რწმუნებულად დავით სამსონიძე დაინიშნა. მანამდე ამ თანამდებობაზე დავით ყულიჯანიშვილი მუშაობდა, მან თანამდებობა პირადი განცხადების საფუძველზე დატოვა. ასევე, შეიცვალა ქალაქ ვალის რწმუნებული, გედევან გოზალიშვილის ადგილი ზურაბ ნასყიდაშვილმა დაიკავა.

რაც შეეხება აწყურის ტერიტორიული ორგანოს რწმუნებულს, ამ თანამდებობაზე შუქრი გოგოლაძე დაინიშნა, რომელმაც გელა მუმლაძე შეცვალა.

- ”აღნიშნული კანდიდატურა სოფლის მოსახლეობამ წამოაყენა, შემდეგ კი სოფლის კრებაც ჩატარდა, სადაც მეც ვიყავი და 90 პროცენტი ამ კანდიდატს უჭერდა მხარს”, - განმარტავს ბესიკ ხითარიშვილი.

წნისის ტერიტორიული ორგანოს ხელმძღვანელად დავით ლაცაბიძე დაინიშნა. მანამდე ეს თანამდებობა ზურაბ კურტანიძეს ეკავა. აგარის ტერიტორიული ორგანოს რწმუნებული კი ზაზა გელაშვილია.

სვირი, ბოგა, ტატანისის ტერიტორიული ორგანოს ხელმმძღვანელის მოვალეობას რამაზ ზედგინიძე შეასრულებს. გელა ლომიძე კი ფერსა, მუგარეთი, გიორგიწმინდის ტერიტორიული ორგანოს რწმუნებული გახდა. ანდრიაწმინდა, ანდა, ახალშენის დასახლებებში ნიკოლოზ ტაბატაძე დაინიშნა. ხოლო წყრუთის ტერიტორიული ორგანოს რწმუნებულად ხაჩატურ ჩახოიანი. რაც შეეხება ურაველის ტერიტორიულ ორგანოს, ეს თანამდებობა ბადრი ზაზაძემ დაიკავა.

[თამარ თოთაძე, ახალციხე]