ადგილი, სადაც შემთხვევა მოხდა23 აპრილის საღამოს, სოფელ აბათხევში სომხურ სამოციქულო ეკლესიასთან ფაცხაში, ვალეში მცხოვრები ახალგაზრდები მეგობრის, ალეკო ხითარიშვილის შვილის დაბადებას აღნიშნავდნენ.
„რომ დაღამდა შუქისთვის „სეტკა“ გავხსენით და მანქანა შიგნით შევაყენეთ, განათება გვინდოდა“, – ამბობს ალეკო ხითარიშვილის მეგობარი ირაკლი ხითარიშვილი.
ამ დროს სოფლებში: აბათხევში, წინუბანსა და ჯულღაში მცხოვრები მამაკაცები აქ სომეხთა გენოციდის 101–ე წლისთავის აღსანიშნავად საბურავების დასაწვავად მივიდნენ: „ყოველ წელს აქ ავდივართ და მაგ გორაზე ღამე „პაკრიშკებს“ ვწვავთ ხოლმე“.
ეთნიკური სომხების გაღიზიანება ღობის შიგნით შეყვანილი მანქანის დანახვამ გამოიწვია: „ბესეტკასთან“ „ზაბორის“ შიგნით მანქანით არ შევდივართ. ვთხოვეთ, სხვა დროს მანდ მანქანას ნუ შეიყვანთ–მეთქი, ყველა ძალიან მთვრალი იყო, ამიტომ ვერ გაიგეს რაზე ვლაპარაკობდით და ამას მოყვა ჩხუბი“.
ჩხუბის მიზეზი, რომ ეს გახდა ამაზე ირაკლი ხითარიშვილიც საუბრობს. თუმცა ირწმუნება, რომ არა მხოლოდ ვალეში მცხოვრები, იქ მისული ეთნიკური სომხებიც მთვრალები იყვნენ.
„გვერდზე ვიდექი მანქანასთან, საბურავი გამიფუჭდა, მეგობარს დავურეკე რომ მოსულიყო და დამხმარებოდა. ჩხუბი რომ დაიწყო ვაშველებდი და უცებ მუცელში ტკივილი ვიგრძენი, სისხლი მომდიოდა, იმ ჩემმა მეგობარმა თავის მანქანაში ჩამსვა და საავადმყოფოში წამიყვანა“, – გვიყვება ხითარიშვილი.
ირაკლი ხითარიშვილიიგი ახალციხის რეფერალური ჰოსპიტალიდან ათი დღის შემდეგ, გუშინ 2 მაისს გაწერეს. ამბობს, რომ დანა ოთხჯერ აქვს დარტყმული. ერთი გვერდზე და სამი მუცლის არეში და აქედან ერთი შემავალი ჭრილობა იყო. სასწრაფო ოპერაციის გაკეთება სწორედ ამიტომ გახდა აუცილებელი. ოთხჯერ დარტყმული დანისა და სისხლის კვალი მის ჯემპრსაც ეტყობა.
„გამიზნულად მე არ მირტყამდნენ დანას. მანამდე არცერთს არ ვიცნობდი, შემთხვევით მოხდა ეს ყველაფერი იმიტომ რომ ყველა მთვრალი ვიყავით“, – ამბობს ირაკლი ხითარიშვილი და ამატებს, რომ ვინ დაარტყა არ იცის, რადგან ღამე იყო და არაფერი ჩანდა.
ვინ დაჭრა ირაკლი ხითარიშვილი არც მისმა მეგობრებმა იციან.
„ღამე იყო და არაფერი ირჩეოდა. ირაკლი რომ დაიჭრა ეგეც მას მერე გავიგეთ ოპერაციაზე რომ შეიყვანეს“, – ამბობენ ვალეში მცხოვრებლები.
ვინ გამოიყენა ჩხუბის დროს დანა, ეს არც მათ იციან, ვინც იმ ღამეს ფაცხასთან გენოციდის 101 წლისთავის აღსანიშნად მივიდა: „ჩვენ ამ ბიჭებთან არაფერი პრობლემა არ გვაქვს. იქ „პაკრიშკები“ რომ დავწვით მერე ერთად დავლიეთ კიდეც. შენ სომეხი ხარ და შენ ქართველი ჩხუბი ამიტომ არ მოგვსვლია, უბრალოდ გაუგებრობა მოხდა და ეს იყო მიზეზი“.
ამ ადგილს დამწვარი საბურავების კვალი ახლაც ეტყობადაპირისპირების მიზეზი რომ ეროვნული განსხვავებულობა არ იყო, ამაზე ალეკო ხითარიშვილიც საუბრობს: „მაგ სოფლიდან ჩემი ოთხი სომეხი ძმაკაცი მეჯინა სუფრასთან. იმ ბიჭებთან პრობლემა არც ჩვენ გვაქვს. ცუდად მოიქცა ის ვინც ირაკლი დაჭრა, მაგრამ რადგან არაა გარკვეული ეს ვინ გააკეთა ყველასთან პრობლემა ვერ გვექნება“.
ადგილზე, სადაც მეზობელ სოფლებში მცოხვრებლები ერთმანეთს დაუპირისპირდნენ დაახლოებით რვა წელია ქართველებიც და სომხებიც სხვადასხვა ღონისძიებების აღსანიშნავად ხშირად იკრიბებიან, თუმცა ამბობენ, რომ ამ დრომდე მსგავს შემთხვევას ადგილი არ ჰქონია.
იმ ღამეს ახალციხის რაიონულმა სამმართველომ მომხდარზე ძიება სისხლის სამართლის კოდექსის 117–ე მუხლის პირველი ნაწილით დაიწყო, რაც ჯანმრთელობის განზრახ მძიმე დაზიანებას გულისხმობს.
როგორც სომეხი მამაკაცები აცხადებენ, პოლიცია მათი დაკითხვისას ცდილობდა, დაჭრის ფაქტი სოფელ აბათხევში მცხოვრები ს.მ–სთვის დაებრალებინათ: „ის ვინც არ ამბობდა, რომ დანა ს.მ–ს ჰქონდა და ვალელი ბიჭი მაგან დაჭრა, სცემდნენ“.
თავად დაჭრილი, აბათხევში მცხოვრებ ს.მ–ს არ იცნობს. ირაკლი ხითარიშვილი ჯერ გამოძიებას არ დაუკითხავს. ვალეში მცხოვრები ის ახალგაზრდები კი რომლებმაც ჩვენება იმ ღამესვე მისცეს, პოლიციელების მხრიდან ზეწოლაზე არ საუბრობენ.
შეკითხვაზე, ჰქონდა თუ არა ადგილი სამართლადამცავების მხრიდან მათზე ფიზიკურ ან სიტყვიერ შეურაცხყოფას, ან რა ხდებოდა მაშინ სამმართველოში, როცა ჩვენებას აბათხევში, ჯულღასა და წინუბანში მცოხვრებლები აძლევდნენ, გვიპასუხეს: „ამაზე არაფრის თქმა არ გვინდა“.
შეგახსენებთ, ეთნიკურად სომეხი ახალგაზრდები აცხადებენ, რომ იმ ღამეს, სამმართველოში, დაკითხვისას ისინი
ცემეს და შესაბამისი უწყებებისგან რეაგირებას ითხოვენ. მომხდარის გამო, ახალციხეში ვიზტს გეგმავს სომხეთის ელჩი საქართველოში იური ვარდანიანი.
ვალეს პოლიცია[თამუნა უჩიძე, ახალციხე]
FM97.5 / LIVE
