ეთნიკური სომხების პოლიციაში შესაძლო ცემის ფაქტი ჯერ კიდევ გამოუძიებელია

სომეხთა გენოციდის 101–ე წლისთავის ღამეს ახალციხის რაიონულ სამმართველოში ეთნიკური სომხების შესაძლო ცემის ფაქტზე პროკურატურამ ძიება მიმდინარე წლის მაისში დაიწყო.

როგორც ერთ–ერთი ეთნიკური სომეხის ადვოკატი ეკა აბაშიძე ამბობს, მისი დაცვის ქვეშ მყოფმა პროკურატურაში ის ფაქტი, რომ იგი სამმართველოს შენობაში სცემეს, დაადასტურა.

„ის ერთ–ერთი ხელმძღვანელი პირის კაბინეტში სცემეს. ვინ სცემა ამისი თქმა ახლა არ შემიძლია, თუ ამოცნობა ჩატარდება, ჩემი დაცვის ქვეშ მყოფი მის ამოცნობას შეძლებს“, – ამბობს აბაშიძე.

მისი თქმით, სამმართველოში ცემის ფაქტზე სხვა მოწმეებიც დაიკითხნენ: „ჩემი დაცვის ქვეშ მყოფის ძმაც ძალიან იყო ნაცემი. მაგრამ ამ საქმის გამოძიების იმედი არ მაქვს. სახელმწიფოს ინტერესებში საგამოძიებო ორგანოების მუშაკების დასჯა არ შედის“.

სამცხე–ჯავახეთის საოლქო პროკურატურაში აცხადებენ, რომ მომხდარზე ძიება ამ დრომდე მიმდინარეობს და ჯერ საბოლოო გადაწყვეტილება ცნობილი არ არის.

პოლიციაში ეთნიკური სომხების შესაძლო ცემის ფაქტით, სახალხო დამცველის აპარატიც დაინტერესდა. ომბუდსმენმა საქმის შესწავლა, ასევე, მაისში დაიწყო: „ამ ეტაპზე მიმდინარეობს მიწერ–მოწერა, სიახლე არაფერია“, – გვითხრეს აღნიშნული უწყების საზოგადოებასთან ურთიერთობის სამსახურში.

სახალხო დამცველის 2016 წლის ანგარიში, სწორედ აღნიშნულ თემას ეხმაურება. ომბუდსმენი მიიჩნევს, რომ პოლიციაში დაკავებულების მიმართ არასათანადო მოპყრობა ქვეყნისთვის მნიშნველოვანი პრობლემაა. ამავე ანგარიშის მიხედვით, სახალხო დამცველის წინადადებების, ან თავად განმცხადებელთა მიმართვის საფუძველზე დაწყებული გამოძიების უმეტესობაზე პროკურატურას პოლიციის თანამშრომლები პრაქტიკულად არ დაუკავებია.

შეგახსენებთ, 23 აპრილს ახალციხის მუნიციპალიტეტის სოფელ აბათხევში ეთნიკურ სომხებსა და ქართველებს შორის შელაპარაკება ფიზიკურ დაპირისპირებაში გადაიზარდა, რის შედეგადაც ვალეში მცხოვრები 24 წლის ირაკლი ხითარიშვილი დაიჭრა. იმ ღამეს ახალციხის რაიონულმა სამმართველომ ძიება სსკ–ის 117–ე მუხლის პირველი ნაწილით დაიწყო, რაც ჯანმრთელობის განზრახ მძიმე დაზიანებას გულისხმობს. ამიტომ პოლიციაში დაპირისპირებული მხარეები დასაკითხად მიიყვანეს.

ეთნიკურად სომეხი ახალგაზრდები აცხადებენ, რომ იმ ღამეს სამმართველოში დაკითხვისას ისინი სცემეს. მათ „სამხრეთის კარიბჭეს“ საშუალებით შესაბამისი უწყებებისგან რეაგირება ითხოვეს. მას შემდეგ, რაც მომხდარის შესახებ რედაქციამ სტატია გამოაქვეყნა, პროკურატურამ ახალციხის რაიონული სამმართველოს თანამშრომლების მიერ უფლებამოსილების შესაძლო გადამეტების ფაქტზე ძიება სსკ–ის 333–ე მუხლით დაიწყო.

[თამუნა უჩიძე, ახალციხე]