ეთნიკური სომხების პოლიციაში შესაძლო ცემის ფაქტზე პროკურატურამ ძიება დაიწყო

სამცხე–ჯავახეთის საოქლო პროკურატურა ახალციხის რაიონული სამმართველოს თანამშრომლების მიერ უფლებამოსილების შესაძლოს გადამეტების ფაქტს სისხლის სამართლის კოდექსის 333–ე მუხლით იძიებს.

გამოძიება მომხდარით მას შემდეგ დაინტერესდა, რაც „სამხრეთის კარიბჭემ“ სტატია სათაურით: ‘გენოციდის ღამეს პოლიციაში გვცემეს’– სამართალდამცავებს ზეწოლაში ადანაშაულებენ“ გამოაქვეყნა.

შეგახსენებთ, 23 აპრილს, ახალციხის მუნიციპალიტეტის სოფელ აბათხევში ეთნიკურ სომხებსა და ქართველებს შორის შელაპარაკება ფიზიკურ დაპირისპირებაში გადაიზარდა. რის შედეგადაც ვალეში მცხოვრები 24 წლის ირაკლი ხითარიშვილი დაიჭრა. იმ ღამეს ახალციხის რაიონულმა სამმართველომ ძიება სსკ–ის 117–ე მუხლის პირველი ნაწილით დაიწყო, რაც ჯანმრთელობის განზრახ მძიმე დაზიანებას გულისხმობს. ამიტომ პოლიციაში დაპირისპირებული მხარეები დასაკითხად მიიყვანეს.

ეთნიკურად სომეხი ახალგაზრდები აცხადებენ, რომ იმ ღამეს, სამმართველოში, დაკითხვისას ისინი ცემეს და შესაბამისი უწყებებისგან რეაგირებას ითხოვენ. მომხდარის გამო, ახალციხეში ვიზტს გეგმავს სომხეთის ელჩი საქართველოში იური ვარდანიანი. რეგიონს უკვე ეწვია შსს მინისტრი გიორგი მღებრიშვილი. ამის შემდეგ სამცხე–ჯავახეთის პოლიციის დეპარტამენტის დირექტორმა თეიმურაზ კალანდაძემ "სამხრეთის კარიბჭესთან" პოლიციაში შესაძლო ცემის ფაქტი კატეგორიულად უარყო.

[თამუნა უჩიძე, ახალციხე]