ომბუდსმენის აპარატი: 'პოლიციაში ფიზიკურ ზეწოლას მხოლოდ ერთი ადასტურებს'

სახალხო დამცველის აპარატმა ეთნიკური სომხების შესაძლო ცემის ფაქტის შესაწავლა რამდენიმე დღის წინ დაიწყო. როგორც აღნიშნულ უწყებაში აცხადებენ, ფიზიკური და ფსიქოლოგიური ზეწოლის ფაქტი, ეთნიკური სომხებიდან მხოლოდ ერთმა დაადასტურა. მაშინ, როცა „სამხრეთის კარიბჭესთან“ ფიზიკური ზეწოლის ფაქტზე სამზე მეტი პირი საუბრობდა.

„ჩვენთან მხოლოდ ერთი პირი აცხადებს, რომ მასზე ზეწოლა ხორციელდებოდა. თუმცა, ჩვენ ამ ეტაპზე იმის დადასტურება, ნამდვილად სცემეს თუ არა იგი პოლიციაში, ან განხორციელდა თუ არა მასზე ზეწოლა, არ შეგვიძლია. ამ ეტაპზე დამატებითი მტკიცებულებების მოძიებას ვცდილობთ“, – ამბობს სახალხო დამცველის აპარატის რეგიონული დეპარტამენტის უფროსი თეიმურაზ ქორიძე.

მისი თქმით, განხორციელდა თუ არა ფიზიკური ზეწოლა ქართველებზე, მათ ინფორმაცია არ აქვთ: „რადგან პროკურატურას მომხდარზე ძიება უკვე დაწყებული აქვს, შესაძლოა მივმართოთ იმასთან დაკავშირებით, რა მიმართულებით მიმდინარეობს ძიება. ან მოვითხოვოთ კონკრეტული პირის მიმართ დაიწყონ ძიება. თუმცა, ამ ეტაპზე არ ვიცით რა შედეგამდე მივალთ“.

რაც შეეხება, 23 აპრილის ღამეს, სოფელ აბათხევში მომხდარ დაპირისპირებას, ქორიძე ამბობს, რომ ეს საყოფაცხოვრებო მიზეზით წარმოქმნილი გაუგებრობა იყო და ეთნიკურ ნიადაგზე კონფლიქტი არ მომხდარა.

შეგახსენებთ, 23 აპრილს ახალციხის მუნიციპალიტეტის სოფელ აბათხევში ეთნიკურ სომხებსა და ქართველებს შორის შელაპარაკება ფიზიკურ დაპირისპირებაში გადაიზარდა, რის შედეგადაც ვალეში მცხოვრები 24 წლის ირაკლი ხითარიშვილი დაიჭრა. იმ ღამეს ახალციხის რაიონულმა სამმართველომ ძიება სსკ–ის 117–ე მუხლის პირველი ნაწილით დაიწყო, რაც ჯანმრთელობის განზრახ მძიმე დაზიანებას გულისხმობს. ამიტომ პოლიციაში დაპირისპირებული მხარეები დასაკითხად მიიყვანეს.

ეთნიკურად სომეხი ახალგაზრდები აცხადებენ, რომ იმ ღამეს სამმართველოში დაკითხვისას ისინი სცემეს. მათ „სამხრეთის კარიბჭეს“ საშუალებით შესაბამისი უწყებებისგან რეაგირება ითხოვეს. მას შემდეგ, რაც მომხდარის შესახებ რედაქციამ სტატია გამოაქვეყნა, პროკურატურამ ახალციხის რაიონული სამმართველოს თანამშრომლების მიერ უფლებამოსილების შესაძლო გადამეტების ფაქტზე ძიება სსკ–ის 333–ე მუხლით დაიწყო.

[თამუნა უჩიძე, ახალციხე]