ხუმრობა თუ სისხლიანი გარჩევა – რა მოხდა რაბათში

შემთხვევა, ახალციხეში, რაბათის დასახლების შესასვლელში, დაახლოებით 17:00– 18:00 საათზე მოხდა. როგორც აქ მცხოვრები, შუახნის ქალი ამბობს, ახალგაზრდების ჩხუბის ხმა დროის სწორედ ამ მონაკვეთში გაიგონა: „მაშინვე ვერ გამოვედი გარეთ, რომ გამოვიხედე აღარავინ იყო. მითხრეს, რომ აქ, ზემოთ, ჩვენი მეზობელი დაუჭრიათ“.

უბანში ყვებიან რომ 23 წლის ს.პ. მისმა მეგობარმა და მეზობელმა დაჭრა: „ვინც დაჭრა ადრე ციხეში იყო და ცოტა ისეთი ტიპია, რომ უნდა ყველა მის ჭკუაზე დადიოდეს. ნასვამები იყვნენ. ამ ბიჭისთვის დანა დაურტყიათ“.

რაბათში მცხოვრებლების თქმით, ის ვინც ახალგაზრდა მამაკაცი დაჭრა, სხვას ეჩხუბებოდა, ს.პ. კი მის გაშველებას ცდილობდა და დანა მუცლის არეში სწორედ ამ დროს მოხვდა.

იმ საღამოს ს.პ. ძმასთან და ორ მეგობართან ერთად უბანში ქეიფობდა.

„ოთხი ვიყავით, სომხურ სასაფლაოსთან დავლიეთ და წამოვედით. ჩხუბი არ ყოფილა, ჭიდაობდნენ და შემთხვევით მოუხვდა დანა. ერთად გავიზარდეთ, ჩვენ შორის დაძაბულობა არასდროს ყოფილა, ახლა რატომ ვიჩუხუბებდით?!“ – ამბობს დაჭრილის ძმა ვ.პ.

რაც შეეხება დანას, რომელიც თან ჰქონდა სავარაუდო დამნაშავეს, დაჭრილის ძმა ამბობს, რომ „პამიდორის დასაჭრელად ქონდა, თორე ისე კი არ ატარებს“.

მომხდარის შემდეგ დაჭრილი ძმამ საავადმყოფოში თავად მიიყვანა: „მუცელი იმიტომ გაუხსნეს, რომ ენახათ შიგნით ჭრილობები ხომ არ ჰქონდა. ახლა კარგადაა, ხვალ ან ზეგ გამოწერენ“.

ახალციხის რეფერალურ ჰოსპიტალში აცხადებენ, რომ დაჭრილის მდგომარეობა დამაკმაყოფილებელია: „უკეთაა. სასწრაფო ოპერაცია ჩაუტარდა“.

როგორც დაჭრილის ძმა ამბობს, უბანში პოლიცია მას შემდეგ გამოჩნდა, რაც ს.პ. საავადმყოფოში მიიყვანეს: „მოვიდნენ, დაათვალიერეს. ექსპერტიზები ჩაატარეს“.

ადგილობრივების თქმით, სამართალდამცავებმა რაბათის შესასვლელში მდებარე ერთ–ერთი მაღაზიიდან ვიდეო თვალის ჩანაწერებიც ამოიღეს.

„იყვნენ მოსულები, მაგრამ ვერაფერი ვერ ნახეს, გაფუჭებულია კამერა, არ იწერს. ისე გამყიდველი შეესწრო რომ ჩხუბობდნენ და გაყარა, აქ ნუ ჩხუბობთო “, – გვიხსნიან მაღაზიაში.

ამავე მაღაზიის გამყიდველი კი ამბობს, რომ თავად ჩხუბის ფაქტი არ უნახავს: „აქ იდგნენ, საუბრობდნენ, მერე რა მოხდა, არ ვიცი“.

რა მოხდა რაბათში 4 ივნისის საღამოს, ამას ახალციხის რაიონული სამმართველო სსკ–ის 117–ე მუხლით იძებს, რაც ჯანმრთელობის განზრახ დაზიანებას გულისხმობს. შინაგან საქმეთა სამინისტროში აცხადებენ, რომ სავარაუდო დამნაშავე იდენტიფიცირებული ჰყავთ, პროკურატურაში კი ამბობენ, რომ ამ დრომდე მის მიმართ სისხლის სამართლებრივი დევნა არ დაწყებულა.დაჭრილის ოჯახს მომხდარზე პრეტენზია არ აქვს.



[თამუნა უჩიძე, ახალციხე]