რა საკითხები განიხილეს ქალაქის საკრებულოს სხდომაზე

დღეს, 23 სექტემბერს ქალაქ ახალციხის მუნიციპალიტეტის საკრებულოს რიგით მეექვსე სხდომა გაიმართა, სადაც დეპუტატებმა სამი საკითხი განიხილეს.

"ადგილობრივი თვითმმართველობის კანონის 156–ე მუხლის თანახმად ახალი საშტატო ნუსხა მომზადდა, რომლის მიხედვითაც ჩვენს მიერ დაგეგმილი კონკურსი გამოცხადდება. მაგალითად, წინა საშტატო ნუსხით განსაზღვრული იყო ქალაქის მერის სამი მოადგილე, ახლა ერთი მოადგილის შტატი მოაკლდა და ასე შემდეგ", – ამბობს საკრებულოს თავმჯდომარე კახა ბერიძე.

ქალაქ ახალციხის მუნიციპალიტეტის ადგილობრივ თვითმმართველობაში სულ 60 საშტატო ერთეულია, აქედან 13 თანამდებობის პირი კონკურსში მონაწილეობას არ იღებს. შესაბამისად ვაკანსია 47 თანამდებობაზე გამოცხადდება.

დღევანდელ სხდომაზე დეპუტატებმა კენჭი უყარეს "ქალაქ ახალციხის მუნიციპალიტეტის საჯარო მოხელეთა დამატებითი საკვალიფიკაციო მოთხოვნების დამტკიცების შესახებ" დადგენილებაში შეტანილ ცვლილებასაც. საკვალიფიკაციო მოთხოვნებში იურისტის ვაკანსიაზე ადვოკატის კვალიფიკაცია იყო მოთხოვნილი, რომელიც დღევანდელი ცვლილების თანახმად ამოიღეს. აღნიშნულ საკითხს სხდომაზე დამსწრე 13 დეპუტატიდან მხარი ყველამ დაუჭირა.

[თამარ თოთაძე, ახალციხე]