ერთი კვირაა სოფელ მაჯადიაში წყალი არ აქვთ

მიუხედავად იმისა, რომ სოფელ მაჯადიაში წყალსადენი არის, წყალი ხშირად მაინც არ მოდის. სოფლები: მაჯადია, დილისკა, ხულგუმო, ჩუნჩხა, პტენა და კულიკამის ნაწილი ერთი 300-მილიმეტრიანი თუჯის წყალსადენით მარაგდება. დეკემბერში ამ წყალსადენზე ავარია უკვე მეორედ მოხდა.

„კიდევ კარგი, თოვლი მოდის, რაღაცას მაინც ვახერხებთ. რამდენიმე დღეა წყალი არ გვაქვს, აქამდეც რამდენჯერმე, დიდი ხნით შეწყდა. არ ვიცი, რატომ ხდება ასე, რომ ვიცოდე, ამით არაფერი შეიცვლებოდა. მაინც იმას აკეთებენ, რაც უნდათ“, – ამბობს მაჯადიას ერთ–ერთი მცხოვრები.

სტატიაში სოფელის მცხოვრებლების ვინაობას იმ მოტივით არ ვასახელებთ, რომ მათსა და სოფლის რწმუნებულს შორის კონფლიქტი არ მოხდეს. რწმუნებული ადგილობროვების საჩივრებს მოღალატურს უწოდებს.

შექმნილი მდგომარეობიდან ყველა თავისებურად პოულობს გამოსავალს.

„რაღაც ახალი წყალსადენი გაყავთ, რომელიც ძველს მიუერთეს, ძველი მილები ვერ უძლებს და მწყობრიდან გამოდის. უკვე მერამდენე დღეა წყალი ხულგუმოდან მოგვაქვს. იძულებული ვართ წყლის ჭურჭელი საწვიმარ მილებს შევუდგათ, რომ პირუტყვს მაინც დავალევინოთ წყალი. სახლში ავადმყოფი ქალი და პატარა ბავშვი გვყავს, რომლებსაც წყალი სულ აჭირდებათ“, - ამბობს სოფლის კიდევ ერთი მცხოვრები.

წელს მაჯადიასთვის აბლარიდან ახალი წყალსადენის გამოყვანა დაიწყეს. გაკეთებულია უკვე 4.5 კმ, მაგრამ საერთო ხაზიდან მაჯადიას ხაზის გამოსაყოფად კიდევ 1.7 კმ-ს ჩაყრაა საჭირო. ამის გაკეთება მომავალ წელს იგეგმება. ახალი მილები ძველ წყალსადენთანაა შეერთებული.

„სოფლის მხარდაჭერის პროგრამით” დაახლოებით 105 ათასი ლარი დაიხარჯა 4.5 კმ სიგრძის წყალსადენის გასაყვანად. ვერ ვიგებთ, წინა მხრიდან არის დაკეტილი თუ წნევას ვერ უძლებს, მაგრამ, ფაქტია, რომ მილები ხშირად გამოდის მწყობრიდან. ავარიის ლიკვიდირებისა და წყალმომარაგების აღსადგენად კვირა მაინცაა საჭირო“, – ამბობს ახალქალაქის მუნიციპალიტეტის ეკონომიკისა და მდგრადი განვითარების სამსახურის ხელმძღვანელი ვაან ბატოიანი.

გამგეობაში იმედი აქვთ, რომ მომავალ წელს სოფელ მაჯადიაში სასმელი წყლის საკითხი ბოლომდე მოგვარდება. დღეს კი, წყლის მიწოდების შეწყვეტის გამო, სოფლის მცხოვრებლები ცუდ მდგომარეობაში ვარდებიან.

„სოფელში რომ გაიაროთ, ერთ წვერგაპარსულ კაცს ვერ ნახავთ. წყალი არ არის, რომ ადამიანმა რაიმე გააკეთოს“, - ამბობს მაჯადიას მკვიდრი.

„წყურვილის დასაკმაყოფილებლად კომპოტებს ვსვამთ. ბავშვები დღეობით ვერ ბანაობენ, საქონელსაც სწყურია. რა დაგვემართება ამ სიტუაციაში, რასაკვირველია, ავად გავხდებით“, – ამბობს კიდევ ერთი მაჯადიელი.

სოფლის რწმუნებული სურიკ ოვაკიმიანი კი გვარწმუნებს, რომ ავარია ლიკვიდირებულია და მალე მაჯადიას მცხოვრებლებს ისევ ექნებათ სასმელი წყალი.

[აღუნიკ აივაზიანი, ახალქალაქი]