ახალქალაქში ხშირად სასმელი წყლის გარეშე რჩებიან

ბოლო ხანებში ახალქალაქის წყალსადენი ხშირად უწყვეტს წყლის მიწოდებას ქალაქის მცხოვრებლებს. ამის გამო ბევრი ახალქალაქელი ჩივის და ამბობს, რომ წყლის შეწყვეტის წინ საჭიროა ხალხის ადგილობრივი ტელევიზიით ან რაიმე სხვა საშუალებით გაფრთხილება.

ცოტა ხნის წინ, წყალსადენზე მომხდარი ავარიის გამო, ყოფილი სამხედრო დასახლების ტერიტორიაზე წყალი 18 საათის განმავლობაში შეწყდა.
`გაერთიანებული წყალმომარაგების~ ადგილობრივი ფილიალის დირექტორის არტაკ ტარლამაზიანის თქმით, წყალი ძირითადად მოულოდნელი ავარიების გამო წყდება. ეს გათიშვები გეგმიური არ არის, ამიტომ ხალხის გაფრთხილებას ვერ ასწრებენ: `ავარიები ძალიან ბევრია, უცებ ხდება და მაშინვე გასარემონტებლად მივდივართ. განსაკუთრებით, თუ ავარია დიდი მასშტაბისაა. ამ დროს კი განცხადებას გააკეთებ თუ არა, სულ ერთია. ხალხს წყლის მომარაგების საშუალება მაინც აღარ აქვს~.

ახალქალაქში ყოველდღიურად რამდენიმე ავარია ხდება. წყალსადენები ცუდ მდგომარეობაშია, მუნიციპალიტეტს კი მათი შეცვლის სახსრები არ გააჩნია. წელს ქალაქის წყალსადენის რემონტისთვის ადგილობრივი ბიუჯეტიდან 30,000 ლარი გამოიყო.

არტაკ ტარლამაზიანი ქალაქის წყალსადენების მდგომარეობას დამაკმაყოფილებლად აფასებს, თუმცა, ავარიული მილების არსებობას არ გამორიცხავს.

ახალქალაქი სასმელი წყლით სამი ხაზიდან მარაგდება. სამივე ხაზი ერთმანეთთანაა დაკავშირებული. დირექციის თქმით, ეს იმიტომ გაკეთდა, რომ ქალაქის ყველა მცხოვრების სახლში წყალი თანაბარი წნევით წავიდეს. თუმცა ქალაქის აღმოსავლეთ და სამხრეთ გარეუბნების მცხოვრებლებს სახლებში წყალი ყოველთვის არ აქვთ, განსაკუთრებით იმ საათებში, როცა ქალაქში ბევრი წყალი გამოიყენება. ამ ოჯახებში წყალი ნორმალურად მხოლოდ ღამით მოდის. `გაერთიანებულ წყალმომარაგებაში~ ამ ფაქტს ქალაქის მცხოვრებლების მიერ წყლის მოხმარების გაზრდითYხსნიან, რის გამოც წნევა ეცემა.

გადავადებული გამრიცხველიანება

ახალქალაქში იურიდიული პირებისთვის წყლის მრიცხველების დამონტაჟება ჯერჯერობით შეჩერებულია. ამ ეტაპზე დაგეგმილიდან მხოლოდ 50-60%-ია დამონტაჟებული.

გამრიცხველიანებამ იურიდიული პირების უკმაყოფილება გამოიწვია. ბევრმა საკუთარი ხარჯით ორგანიზაციისთვის მრიცხველის დაყენებაზე უარი განაცხადა. მრიცხველების მონტაჟი დროებით, არჩევნებამდე შეჩერდა, თუმცა, პროცესი ჯერაც არ განახლებულა.

”მონტაჟის მომენტიდან სამი თვის განმავლობაში აბონენტები წყლის გადასახადისგან გათავისუფლებულნი არიან. უნდა იყოს ქრონომეტრაჟი, მაგრამ ამისთვის დრო აღარ დარჩა, ამიტომაც შევაჩერეთ. მონტაჟს მომავალ წელს გავაგრძელებთ, როგორც კი დათბება”, - ამბობს ტარლამაზიანი.

იურიდიული პირებისთვის წყლის გადასახადი 1 კბ/მ-სთვის 4.31 ლარია. არტაკ ტარლამაზიანის თქმით, ფასი ადგილზე არ დაუდგენიათ, ეს თბილისში მოხდა და ტარიფი მთელ საქართველოში იგივეა. იურიდიული პირები მიიჩნევენ, რომ ფასი ძალიან მაღალია.

[შუშან შირინიანი, ახალქალაქი]