სოფელ ხევაშენში ოთხი დღეა წყალი არ მოდის

მოსახლეობა საჯაროდ წყლის პრობლემაზე საუბარს ერიდება, თუმცა პირად საუბრებში აცხადებენ, რომ სასმელი წყალი არ მოდის. ეზოში მოსავლის მორწყვაზე კი ლაპარაკი ზედმეტია.

„ოთხი დღის განმავლობაში სადღაც ერთი საათით მოვიდა მხოლოდ წყალი, ისიც ისე ცოტა მოდიოდა, რომ ერთი „ბაკის“ ავსება მოვახერხე და დაშრა“, – გვითხრა ერთ–ერთმა ადგილობრივმა.

ადიგენის მუნიციპალიტეტის მერის მოადგილე არსენ ბალახაშვილი ამბობს, რომ სოფელს წყალი განრიგით აქვს, თუმცა მოსახლეობის განცხადებით არანაირ განრიგზე საუბარი აღარ არის, რადგან წყალი დღეებია არ მიეწოდებათ.

სოფელ ხევაშენში წყალი არ მოდიოდა ორი კვირის წინაც. მოსახლეობამ მაშინ მსგავსი განმარტება მოისმინა – „აბასთუმანში ინტერნეტი გაჰყავთ, მანქანების მუშაობის დროს წყლის მილიც დაზიანდა“.

მილის დაზიანების ფაქტს ადასტურებს არსენ ბალახაშვილი და ამბობს რომ ამ დროსთვის პრობლემა აღმოფხვრილია.

თუ რატომ არ მოდის ამ დროსითვის სოფელში წყალი მაინც გაურკვეველი რჩება.

„როცა „ბასეინში“ წყალი დაგროვდება სოფელში წყალიც განრიგით მოვა“, – ამბობს არსენ ბალახაშვილი.

„განრიგზე ლაპარაკიც სასაცილოა. ახლა ოთხი–ხუთი დღეა რაც არ მოდის, მაგრამ დატანჯულები ვართ. წლებია ასე ვართ, როდის მოვა წყალი, როდის წავა არ ვიცით. გადახმა და გადაიხრუკა ყველაფერი“, – მითხრეს სოფელში.

როცა სიცხე პიკს აღწევს, როცა სოფელში დამსვენებლები ჩამოდიან და როცა მოსავლის რწყვის პერიოდია სოფელში წყალი არ არის.

სოფელ ხევაშნის ცენტრში წყაროს წყალი მოდის, თუმცა ყოველ დღე ასობით ლიტრი წყალი 100–150 მეტრზე და მეტი მანძილიდან მიიტანო ძალიან რთულია.

[გულო კოხოძე, ადიგენი]