ადიგენის საკრებულოში ფრაქციის შექმნაზე სამი განაცხადი შევიდა

ადიგენის საკრებულოს თავმჯდომარის იმედა მღებრიშვილის განცხადებით, ფრაქციებს კომისიებში განხილვის შემდეგ დაარეგისტრირებენ.

უმრავლესობის ფრაქციას, 12 დეპუტატის შემადგენლობით, „ქართული ოცნება“ ერქმევა და მას შალვა გავაშელი უხელმძღვანელებს. მეორე ფრაქციას, „ევროპულ საქართველოს“, სამი დეპუტატი დააკომპლექტებს და ამავე სახელწოდების იქნება. მას სიმონ პარუნაშვილი უხელმძღვანელებს.

მესამე ფრაქციაში კი „ევროპული საქართველოს“ ორი და „ნაციონალური მოძრაობის“ ერთი დეპუტატი გაერთიანდება. ამ ფრაქციას „ადიგენი“ ერქმევა და მისი თავმჯდომარე ზურბ შაინიძე იქნება.

საკრებულოს თავმჯდომარის განმარტებით, ადიგენის წარმომადგენლობით ორგანოში ფრაქციებთან დაკავშირებით განაცხადების მიღება ამით არ დასრულებულა და სავარაუდოდ კიდევ ორი ფრაქცია შეიქმნება.

შეგახსენებთ, რომ ადიგენის საკრებულო გუშინ, 20 ნოემბერს დაკომპლექტდა, აირჩიეს ახალი თავმჯდომარე, მისი მოადგილე და კომისიების თავმჯდომარეები.

ადიგენის საკრებულოში სულ 30 დეპუტატია, – 15 მაჟორიტარული, ამდენივე კი პროპორციული წესით არჩეული. 30 დეპუტატიდან 7 ოპოზიციონერია.

[ლუბა გიორგაძე, ახალციხე]