პროფესიულ პროგრამებზე სწავლის მსურველებისთვის ტესტირების დღე ცნობილია

ახალციხის პროფესიულ კოლეჯ "ოპიზარში“ დარეგისტრირებული პირებისათვის ტესტირება მეექვსე და მესამე საჯარო სკოლებში გაიმართება. საათნახევრის განმავლობაში მათ გამოცდის ჩაბარება ზოგად უნარებსა და დარგობრივ სფეროში მოუწევთ.

განათლებისა და მეცნიერების სამინისტროს ინფორმაციით, დარეგისტრირებული პირები, პირველ ეტაპზე საგამოცდო ბარათის დამზადების თაობაზე მოკლე ტექსტურ შეტყობინებას მიიღებენ, რის შემდეგაც, მათ ბარათის აღება პირადობის მოწმობის საფუძველზე, ნებისმიერ სარეგისტრაციო პუნქტში შეეძლებათ. სწავლის მსურველები ტესტირების ჩატარების ზუსტ დროსა და ადგილს საგამოცდო ბართის საშუალებით შეიტყობენ.

პროფესიული განათლების მიღების მსურველთა რეგისტრაცია 28 მარტიდან დაიწყო. ახალციხის საზოგადოებრივ კოლეჯ "ოპიზარში“ 161 ადგილზე 270 განაცხადი შევიდა. კოლეჯმა მიღება 9 პროფესიულ პროგრამაზე გამოაცხადა.

[sknews.ge]