პროფესიულ კოლეჯ „ოპიზარში“ 390 აპლიკანტი დარეგისტრირდა

ახალციხის პროფესიულ სასწავლებელში სწავლა 21 ნოემბრს იწყება. თუმცა მანამდე აპლიკანტმა სტუდენტობის მანდატის მოსაპოვებლად ტესტირებაში 25%–იანი ზღვარი უნდა გადალახოს. „ოპიზარში“ სწავლება 15 სპეციალობაზეა შესაძლებელი.

ტესტირებამდე ერთი დღით ადრე, დღეს, 15:00 საათზე აპლიკანტები სურვილის მიხედვით პრეტესტს ჩააბარებენ, თუმცა რამდენი გამოცხადდება „ოპიზარის“ ადიმინისტრაციაში ჯერ ინფრომაცია არ აქვთ.

„ეს მათ სურვილზეა დამოკიდებული. იციან რომ პრეტესტი დღეს უნდა ჩატარდეს“, – ამბობს „ოპიზარის“ დირექტორი ბელა ავალიანი.

შეფასებისა და გამოცდების ეროვნული ცენტრის ინფორმაციით, პროფესიული ტესტირება 29 ოქტომბერს 09:00 საათიდან ჩატარდება.

პროფესიულ ტესტირებაზე გამოცხადება სავალდებულოა, რადგან სახელმწიფო დაფინანსებით, სახელმწიფო საგანმანათლებლო დაწესებულებებში უფასო განათლების მიღების შესაძლებლობა მიეცემათ სწორედ იმ აპლიკანტებს, რომლებიც ტესტირებისას გადალახავენ მინიმალური კომპეტენციის ზღვარს.

[თინათინ ზაზაძე, ახალციხე]