კოლეჯ ‘ოპიზარში’ ავტორიზაცია კიდევ 8 პროგრამამ გაიარა

დღეს, 6 აგვისტოს ახალციხის კოლეჯ „ოპიზარში“ ღია კარის დღე გაიმართა. დაწესებლების ადმინისტრაციამ სტუმრებს უკვე არსებული და ახალი პროგრამების ჩამონათვალი გააცნო.

მიმდინარე წელს, კოლეჯი პროფესიული განათლების მსურველთათვის მიღებას 16 პროფესიულ საგანმანათლებლო პროგრამაზე აცხადებს. მათგან 8 ახალია:

• საბაჟო საქმე;
• საფინანსო სერვისები;
• საოფისე საქმე;
• თმის მომსახურება;
• სამკერვალო წარმოება;
• კულინარიის ხელოვნება;
• ფერმერობა;
• აგრომექანიზაცია ზოგადი განათლების საშუალო საფეხურის სწავლის შედეგების ინტეგრირებით.

მათი ინფორმაციით, შემუშავდა ჩარიცხვის ახალი მიდგომა, რომელიც ზრდის სოციალურად დაუცველი და სპეციალური საჭიროების მქონე პირების პროფესიულ განათლებაზე წვდომას, მათთვის საკონკურსო ქულა სპეციალური კოეფიციენტით დაანგარიშდება და ექნებათ საკონკურსო უპირატესობა.

პროგრამებზე, რომლებზეც მოთხოვნადია ბაზარზე, მაგრამ არ არის პოპულარული ახალგაზრდებს შორის, თუ არ დაფიქსირდება კონკურსი, აპლიკანტები ჩაირიცხებიან ეროვნული ტესტირების გარეშე კოლეჯის შიდა შერჩევის გზით.

პროფესიულ პროგრამებზე რეგისტრაცია და ჩარიცხვა მოხდება წელიწადში ერთხელ.

დღესვე ადგილზე დარეგისტრირდნენ ის აბიტურიენტებიც, რომლებმაც ვერ შეძლეს ონლაინ დარეგისტრირება.

"ღია კარის დღე შედგა იმისათვის, რომ პირველ რიგში აპლიკანტებისთვის გაგვეცნო ის პროგრამები, რომლებზეც ახლა გავიარეთ ავტორიზაცია და მათთვის ცნობილი არ იყო. კოლეჯში სწავლა ოქტომბრის თვიდან განახლდება, პროფესიულ პროგრამებზე რეგისტრაცია და ჩარიცხვა მოხდება წელიწადში ერთხელ",- გვითხრა კოლეჯ "ოპიზარის" დირექტორმა ბელა ავალიშვილმა.

"ოპიზარი" 2020 წელს, 16 პროფესიულ საგანმანათლებლო პროგრამაზე მირებას 10 აგვისტომდე აცხადებს. პროფესიული გადამზადების მოკლევადიან პროგრამებზე კი, რეგისტრაცია 6 აგვისტოს იწყება და 1-ლი სექტემბრის ჩათვლით გაგრძელდება.



[რიმა სარუხანიან]