‘ოპიზარში’ პროფესიულ პროგრამებზე რეგისტრაცია დაიწყო

შემდუღებლის, მზარეულის, ვეტერინარის, სტილისტის, ინფორმაციის ტექნოლოგიისა და მეთევზის პროფესიებზე სასწავლებელი 82 სტუდენტის მიღებას შეძლებს.

როგორც "ოპიზარის" დირექტორი ბელა ავალიშვილი ამბობს, სამ პროფესიაზე – სტილისტის, ინფორმაციის ტექნოლოგიის და მეთევზის – სწავლება მოდულური პროგრამით იქნება: „ეს განსხვავებული სწავლების სტილია. სასწავლო საკითხები მოდულებადაა დაყოფილი და ამ მოდულებშია ჩაშლილი კრედიტები. მაგალითად, ვეტერინარიაში არის მოდული ცხოველთა ხელოვნური განაყოფიერება, სტუდენტმა შეიძლება გაიაროს ეს მოდული და იყოს ხელოვნური განაყოფიერების სპეციალისტი. მას ამისი დამადასტურებელი სერთიფიკატიც ექნება“.

სასწავლებელში, განაცხადების მიღება დღეს, 10 აპრილს დაიწყო და 22 აპრილს დასრულდება. რეგისტრაციის გასავლელად პირადობის მოწმობა და განათლების დამადასტურებელი დოკუმენტებია საჭირო. დარეგისტრირება ონლაინ, ასევე კოლეჯსა და საგანმანათლებლო რესურსცენტრშია შესაძლებელი. რეგისტრაციის დასრულების შემდეგ სტუდენტები ჯერ პრეტესტებს გაივლიან, შემდეგ კი ტესტებს დაწერენ.

[მარიამ ბარძიმაძე, ახალციხე]