ახალციხის 11 სოფელი საშემოსავლო შეღავათებით ისარგებლებს

აღნიშნული გადაწყვეტილება ძალაში საქართველოს საგადასახადო კოდექსში ცვლილებების შეტანის შემდეგ, 2016 წლის 4 მარტიდან შევიდა.

„საქართველოს საგადასახადო კოდექსში ცვლილების შეტანის შესახებ“ საქართველოს კანონით (4842-IIს, 04.03.16) საქართველოს საგადასახადო კოდექსის 309-ე მუხლს დაემატა 91-ე ნაწილი, რომლის შესაბამისად, საშემოსავლო გადასახადში 2016 წლამდე არსებული შეღავათი შეუნარჩუნდათ პირებს, რომლებიც 2016წლამდე, მაღალმთიანი დასახლებების სტატუსის გამო სარგებლობდნენ ამ შეღავათებით“, – განგვიმარტეს ფინანსთა სამინისტროში.

საშემოსავლო შეღავათებით შემდეგი სოფლები ისარგებლებენ: ზიკილია, წნისი, საყუნეთი, აწყური, მუგარეთი, კლდე, ღრელი, ფერსა, ტყემლანა, წყრუთი და გურკელი.

„ახალი კანონის თანახმად, რომელ სოფლებსაც გაუუქმდათ მაღალმთიანის სტატუსი, იქ მცხოვრებ მოსახლეობაზე უარყოფითი გავლენა რომ არ ექონია ამ პროცესებს, ამიტომ მთავრობამ ჩათვალა საჭიროდ, რომ ის შეღავათები რომლებიც მანამდე არსებობდა საგადასახადო კუთხით, დაეტოვებინათ, ეს არ ეხება სხვა საკითხებს“, – განაცხადა მთის განვითარების ეროვნული საბჭოს მდივანმა ოთარ კონჯარიამ.

შეგახსენებთ, რომ ამ ეტაპზე მაღალმთიანი დასახლების სტატუსით ახალციხის მუნიციპალიტეტში ჯამში 30 დასახლება სარგებლობს. ყველანაირი შეღავათების გარეშეა დარჩენილი მუნიციპალიტეტის მასშტაბით 5 სოფელი: მინაძე, ჭაჭარაქი, აგარა, ივლიტა და ზემო სხვილისი.

[თინათინ ზაზაძე, ახალციხე]