ვინ გაემგზავრება სამცხე–ჯავახეთიდან ამერიკაში FLEX-ის პროგრამით

FLEX–ის პროგრამის ფარგლებში, ამერიკაში ერთი აკადემიური წლის განმავლობაში ქალაქ ახალციხის სკოლებიდან – 4, სოფელ კლდიდან – 1, ადიგენიდან – 1, ბორჯომიდან – 4, ხოლო ნინოწმინდიდან – 3 მოსწავლე გაემგზავრება.

ამ 13 მოსწავლის გარდა, შესაძლოა ამავე პროგრამით ამერიკაში სარეზერვო სიაში შესული მოსწავლეებიც წავიდნენ. რეზერვი ნიშნავს, რომ ისინი იმ შემთხვევაში გაემგზავრებიან სასწავლებლად, თუ საქართველოს მასშტაბით შერჩეული მონაწილეებიდან ვინმემ წასვლა ვერ შეძლო.

მოსწავლეები ამერიკაში ივლისი–აგვისტოს თვეში გაემგზავრებიან.

პროგრამა FLEX ყოფილი საბჭოთა კავშირის 10 ქვეყნის მოსწავლეთათვის განკუთვნილი გაცვლითი პროგრამაა, რომელიც სრულად ფინანსდება აშშ–ს სახელმწიფო დეპატრამენტის მიერ. მასში მონაწილეობის მიღება მე-9, მე-10 და მე-11 კლასის კარგი ან საუკეთესო აკადემიური მოსწრების მქონე მოსწავლეებს შეუძლიათ, რომლებიც ინგლისურ ენას ფლობენ.

კონკურსი სამი რაუნდისაგან შედგება:
1. ინგლისურის მოკლე ტესტი;
2. თემები ინგლისურად;
3. ინგლისურის სტანდარტული ტესტი, თემები, აპლიკაცია და ინტერვიუ.

მოსწავლეებს კონკურსში მონაწილეობის მიღება წელიწადში მხოლოდ ერთხელ შეუძლიათ.

[თაკო ფეიქრიშვილი, ახალციხე]