Flex -ის პროგრამის ახალციხელი ფინალისტების ვინაობა ცნობილია

FLEX-ის პროგრამის ფინალისტები ახალციხის N1 საჯარო სკოლის მეთერთმეტე კლასის მოსწავლეები: თამარ თათეშვილი, თორნიკე მანველიშვილი და კერძო სკოლა „მზექას“ მოსწავლე ნინო ჩილინგარაშვილი გახდნენ.

მათ პროგრამის სამი ეტაპი წარმატებით გადალახეს და საკუთარი შედეგის შესახებ დღეს, 13 მაისს შეიტყვეს.

„შარშან მესამე ტურამდე გავედი და საბოლოო პასუხი უარი მითხრეს, მაგრამ, წელს დამირეკეს და ფინალისტი ვარ. ამიტომ თუ საკუთარ თავზე იმუშავებ და თუ მონდომებული ხარ, რომ გადალახო ეს სამი ეტაპი, შეუძლებელი არაფერია“, - ამბობს თამარ თათეშვილი.

FLEX-ის პროგრამა ამერიკაში ერთი წლით უფასო სწავლებასა და ცხოვრებას გულისხმობს, თუმცა გაემგზავრებიან თუ არა მონაწილეები 2020 წელს ამერიკაში ამის შესახებ ჯერ ვერ საუბრობენ: „კორონავირუსის გამო ჯერ არ ვიცით წავალთ თუ არა. მოგვწერეს კიდეც მსგავსი იმეილი, მაგრამ ჩვენ ყველანაირად მოვემზადებით რომ წავიდეთ, მოვამზადებთ პასპორტს, ვიზას და ა.შ.“, - ამბობს ფინალისტი.

პროგრამა FLEX სრულად ფინანსდება აშშ–ს სახელმწიფო დეპარტამენტის მიერ. მასში მონაწილეობის მიღება მე-9, მე-10 და მე-11 კლასის კარგი ან საუკეთესო აკადემიური მოსწრების მქონე მოსწავლეებს შეუძლიათ, რომლებიც ინგლისურ ენას ფლობენ.

კონკურსი სამი რაუნდისაგან შედგება:

1. ინგლისურის მოკლე ტესტი;
2. თემები ინგლისურად;
3. ინგლისურის სტანდარტული ტესტი, თემები, აპლიკაცია და ინტერვიუ.

მოსწავლეებს კონკურსში მონაწილეობის მიღება წელიწადში მხოლოდ ერთხელ შეუძლიათ.

[თაკო ფეიქრიშვილი, ახალციხე]