ასპინძაში საკრედიტო ორგანიზაცია „ჯი ეი კაპიტალს“ შესასვლელი ჩაუკეტეს

დღეს დილიდან ასპინძაში, ყაზბეგის №2–ში მდებარე საკრედიტო ორგანიზაცია „ჯი ეი კაპიტალის“ შესასვლელი ჩაკეტილია და თანამშრომლები გარეთ იცდიან.

„ვიდრე კართან მიხვალ კიბეა ასასვლელი და ისაა ჩაკეტილი, წვიმს და გარეთ ვდგავართ“, – ამბობს „ჯი ეი კაპიტალის“ აღმასრულებელი დირექტორი ლელა კახიძე.

კახიძემ ასპინძის რაიონულ სამმართველოს წერილობით უკვე მიმართა: „შევიტანე განცხადება და რეაგირებას ველოდებით. ნაძალადევად მაგას არ გავხსნი“.

ორგანიზაციის შესასვლელი ასპინძის მკვიდრმა, ამავე ორგანიზაციის მსესხებელმა და „ჯი ეი კაპიტალის“ წინ მდებარე 194 კვადრატული მეტრი მიწის მესაკუთრემ გელა ლონდარიძემ ჩაკეტა.

„მე ვარ ამ მიწის მეპატრონე. ცხრა თვეა რაც ეგ ტერიტორია აუქციონზე შევისყიდე. ამის შემდეგ შენობის მესაკუთრემ ჯამბულ ხოზრევანიძემ შემომთავაზა შევისყიდიო. დავთქვით თანხაც, დღეც მაგრამ მატყუებს. ბოლოს შევთანხმდით, რომ 10 მარტს უნდა გადამეფორმებინა, მაგრამ რამდენი დღე გავიდა მას მერე?!“ – კითხულობს გელა ლონდარიძე.

მისი თქმით, მან იმ შენობის მესაკუთრესთან, რომელშიც „ჯი ეი კაპიტალია“ და ასევე მის შვილთანაც დაკავშირება გუშინ არა ერთხელ სცადა, თუმცა როგორც თავად ამბობს, მის სატელეფონო ზარებს არცერთმა უპასუხა, დღეს კი კუთვნილი ტერიტორია შემოღობა.

ხოზრევანძე აცხადებს, რომ გელა ლონდარიძესთან თავად შეხება არასდროს ჰქონია და არც ის იცის დანამდვილებით, რომ გზა მან ჩაკეტა. თუმცა, ამბობს, რომ ლონდარიძემ ორგანიზაციის თანამშრომლები, რომლებიც მის შენობაში ქირით არიან, გააფრთხილა.

„არასწორადაა ეგ მიწა აქუციონზე გამოტანილი, მანდ სახანძრო ზოლია და იქ რაიმეს აშენება არ შეიძლება, თან ჩვენი ნებართვის გარეშეც ვერაფერი ჩაიდგმება, ასეც რომ არ იყოს ნაყარი მიწაა და ზედ რაიმეს აშენება დაუშვებელია“, – ამბობს ხოზრევანძე.

თუმცა, მისივე ნათქვამიდან ირკვევა, რომ წლების წინ აქ ეს ტერიტორია სწორედ აუქციონის გზით თავად იყიდა: „მერე ფულის შეტანა დაგვავიწყდა და ახლა ეს შესასვლელი ჩვენი მაგიტომ აღარაა. არადა შენობას შესასვლელი სჭირდება. მერე ეს ადგილი აუქციონზე თავიდან გამოიტანეს, ვერ გავიგეთ და ლონდარიძემ იყიდა. ამის მერე იძახის გადავკეტავო, არადა 8–10 წელია შენობა ჩემია. შესაბამისი ორგანოები დაადგენენ ალბათ ეს ადგილი რამდენად სწორად გაიყიდა“.

აუქციონზე 194 კვადრატული მეტრი ასპინძის მუნიციპალიტეტის გამგეობამ გასაყიდად 2015 წლის ივლისში გაიტანა. თუმცა, გამგეობაში ხოზრევანიძის ბრალდებებს უარყოფენ და აცხადებენ, რომ აღნიშული ტერიტორიის აუქციონის წესით გაყიდვა თავად ხოზრევანძეს სურდა.

„ეს მიწა სახელმწიფოსი იყო და რადგან შენობა ჰქონდა მანდ ხოზრევანიძეს მის წინ მდებარე ტერიტორიით უკანონოდ სარგებლობდა. უნდოდა რომ კანონიერი მფლობელი ყოფილიყო, მაგრამ ჩვენ პირდაპირ მიყიდვის უფლება არ გვქონდა. თავად მოიტანა ნახაზი მაგ მიწის და გვთხოვა აქუციონზე გაგვეტანა, გავიტანეთ და ლონდარიძემ მოუგო“, – ამბობს ასპინძის მუნიციპალიტეტის გამგებელი ლევან ცაბაძე.

ხოზრევანიძე კი დარწმუენბულია, რომ მიწის გაყიდვის კანონიერების საკითხს სამართალდამცავები გაარკვევენ: „ბუნებრივია, ვიჩივლებთ“.

თუმცა, ვიდრე ხოზრევანიძე იჩიველბს და სამართალდამცავები მიწის გაყიდვის კანონიერებას გამოიკვლევენ, გელა ლონდარიძეს „ჯი ეი კაპიტალისთვის“ იძულებით აღსრულების წესით დაახლოებით 9 000 ლარის გადახდა მოუწევს. როგორც სასამართლოში აღშნიშნული ორგანიზაციის ინტერესების დამცველი ეკა აბაშიძე ამბობს, ლონდარიძის ოჯახის წევრებთან „ჯი ეი კაპიტალს“ სამი ხელშკერულება აქვს გაფორმებული და სესხის გადაუხდელობის გამო, სასამართლოში დავაც გასული წლის მარტში დაასრულა.

სწორედ ამ დავას უკავშირებენ ჯამბულ ხოზრევანიძე და „ჯი ეი კაპიტალის“ თანამშრომლები დღეს გზის ჩაკეტვას: „არასწორად მოიქცა ეს ახალგაზრდა, ამას ალბათ უფრო შურისძიების სახე აქვს“.

თავად ლონდარიძე შურისძიებაზე არა, თუმცა „ჯი ეი კაპიტალთან“ სასამართლო დავაზე საუბრობს და ამბობს, რომ ორგანიზაციამ 3000 ლარიანი დავალიანება 9000–მდე აუყვანა: „სესხს რომ ვიხდიდი 300 ლარი მაკლდებოდა, ვთხოვე ლელა კახიძეს ანგარიში გაეწია და პროცენტი დაეკლო. ანუ პროცენტის პროცენტის დაკლებას ვითხოვდი და სასაცილოდ ამიგდეს. წამოვედი და არც ის თანხა შემიტანია. მერე სასამართლოს გადამცეს“.

სასამართლოს გადაწყვეტილებით ვიდრე იძულებით აღსრულების წესით ლონდარიძისგან თანხას ამოიღებენ, შესაძლოა მის წინააღმდეგ სასამართლოში კიდევ ერთი დავა დაიწყოს. როგორც „ჯი ეი კაპიტალის“ ადვოკატი ეკა აბაშიძე ამბობს, დღეს გარდა ორგანიზაციისა, იმის გამო, რომ შენობაში მსესხებლები ვერ შევიდნენ, პროცენტი ვერ გადაიხადეს: „დრო ფულია და ამ პროცესის შეფერხების გამო მიყენებულ ზარალს დაითვლიან, შემდეგ კი მის ამოღებაზე იფიქრებენ“.

მანამდე კი ორგანიზაციის თანამშრომლები ჩაკეტილ კართან იცდიან და სამართალდამცავების მხრიდან რეაგირებას ელიან.

„განცხადებაზე, რომელიც მათ შემოიტანეს წინასაგამოძიებო მოკვლევა დაიწყება, თუ დანაშაულის ნიშნები გამოიკვეთება ძიება გაგრძელდება“, – აცხადებენ საქართველოს შინაგან საქმეთა სამინისტროს საზოგადოებასთან ურთიერთობის სამსახურში.

[თამუნა უჩიძე, ასპინძა]