დაუდასტურებელი ინფორმაციით ასპინძის გამგებლის მოადგილე დააკავეს

ლევან ხოზრევანიძე დღეს, 25 მარტს, სამსახურში არ ყოფილა. როგორც ასპინძის მუნიციპალიტეტის გამგებელი ლევან ცაბაძე ამბობს, ხოზრევანიძე მას დაახლოებით 13:00 საათისთვის დაუკავშირდა, უთხრა, რომ შვილიშვილი ჰყავდა ცუდად და ამის გამო შეიძლება სამსახურში მისვლა დაგვიანებოდა, ან საერთოდ ვერ მისულიყო.

რაც შეეხება მის დაკავებას, ცაბაძე აცხადებს, რომ ამის შესახებ არაფერი იცის. თანამშრომლის პასუხისგებაში მიცემის შესახებ ინფორმაციას გამგეობის სხვა თანამშრომლებიც არ ფლობენ. არაფერი იციან მომხდარის შესახებ ასპინძის საკრებულოშიც.

„მიწების კომისიის თავმჯდომარე ვარ და ამიტომ ამჟამად გასული ვარ სამსახურიდან. ერთ-ერთმა ახლობელმა დამირეკა და მითხრა, რომ ამასთან დაკავშირებით რაღაც ხდება, მეტი არაფერი ვიცი. ცოტახანში სამსახურში ვიქნები და გავერკვევი ვითარებაში“, - გვითხრა ასპინძის მუნიციპალიტეტის საკრებულოს თავმჯდომარის მაოდგილემ ნუგზარ ლონდარიძემ საღამოს საათებში. სამსახურში დაბრუნების შემდეგ კი განაცხადა, რომ თვითმმართველობაში ჩვეუელბრივი სამუშაო გარემოა და ხოზრევანიძის დაკავების შესახებ დეტალები არც ამჟამად იცის.

თავად ლევან ხოზრევანიძის ტელეფონი მიუწვდომელია. ასპინძაში ადგილობრივები კი ამბობენ, რომ დილის საათებში სამართალდამცავების სიმრავლე შეინიშნებოდა, თუმცა რა მოხდა ზუსტად არც მათ იციან.

კითხვაზე, ადასტურებდნენ თუ არა ხოზრევანიძის დაკავებას, შინაგან საქმეთა სამინისტროში გვიპასუხეს, რომ ამის შესახებ ინფორმაციას ცოტახანში თავად გაავრცელებდნენ, თუმცა ამ დრომდე ოფიციალურ უწყებას მომხდარის შესახებ ინფორმაცია არ გაუვრცელებია.

ლევან ხოზრევანიძე ასპინძის მუნიციპალიტეტის გამგებლის მოადგილედ მიმდინარე წლის იანვარში დაინიშნა. იგი 2013 წლის 23 ივლისიდან 2014 წლის 1 აპრილამდე ეროვნული სატყეო სააგენტოს სამცხე-ჯავახეთის სატყეო სამსახურის უფროსად მუშაობდა. გასულ წლებში პოლიციის თანამშრომელიც იყო.

[თამუნა უჩიძე, ახალციხე]