სასამართლო გადაწყვეტს გამოასახლებენ თუ არა იძულებით იაკობაძეებს

დაახლოებით ორ კვირაში, გულთამზე იაკობაძესა და მის შვილს პოლიციამ შესაძლოა ბინა იძულების წესით დაატოვებინოს. სწორედ ამ ვადაში დაასრულებს სასამართლო გულთამზე იაკობაძის ბინის მყიდველის, დემურ ბოდოკიას სარჩელის განხილვას.

ბოდოკიამ გულთამზე იაკობაძის ბინა ახალციხეში აიქციონზე 10 450 ლარად იყიდა. მას შემდეგ იკაობაძემ და ბოდოკიამ მოლაპარაკება სცადეს. ბოდოკია მას ბინის გამოსყიდვას 10 000 დოლარად სთავაზობდა.

„ამ ბინის საბაზრო ღირებულება მინიმუმ 12 000 დოლარია, მაგრამ 10 000–ს თუ მომცემდა ვთმობდი. თან მე ამ ბინას უახლოეს ორ წელში თუ გავყიდი საშემოსავლო 2 000 მექნება გადასახდელი, მაგრამ ვერ გამოისყიდა და ახლა ამბობს ბინას არ დავთმობო“, – აცხადებს ბოდოკია.
იაკობაძეებმა მძიმე სოციალური მდგომარეობის გამო ბინის გამოსყიდვა მართლაც ვერ შეძლეს. თუმცა ამბობენ, რომ ბინას არ დათმობენ, რადგან წასასვლელი არსად აქვთ.

ბოდკიას სარჩელზე მათ სასამართლოში შესაგებელი უკვე წარადგინეს, სადაც წერია, რომ ბინის ნაწილი სწორედ გულთამზე იაკობაძეს ეკუთვნის, ნაწილი კი მისი ქმრის კუთვნილებაა. ბინა კი ქმრის გამო გაიყიდა და თავად გულთამზეს რაიმე ფულადი ვალდებულება არავისთან ჰქონია.

„ამიტომ ვითხოვთ, რომ გულთამზე იაკობაძე დარჩეს ბინის იმ ნაწილში, რომელიც მისი საკუთრებაა, ის კი რაც მის ქმარს ეკუთვნის გაყიდონ“, – ამბობს ადვოკატი ნუგზარ სამარჯიშვილი.

რა გადაწყვეტილებას გამოიტანს სასამართლო დაახლოებით ორ კვირაში გაირკვევა. იძულებით აღსრულების შემთხვევაში სასამართლოს გადაწყვეტილება აღსრულების ბიუროს გადაეგზავნება, შემდეგ კი პოლიციის ძალით იაკობაძეებს ბინას დაატოვებინებენ.

„ადამიანურად ძალიან უხერხულად ვგრძნობ თავს, მაგრამ რა გავაკეთო არ ვიცი, მივეცი დრო რომ ბინა გამოესყიდათ, მაგრამ ვერ შეძლეს. მათთვის არაფერი წამირთმევია, მე თუ არა ვიღაცა ხომ მაინც იყიდდა მაგ ბინას აუქციონზე?!“ – ამბობს ბოდოკია.

იაკობაძეები კი აცხადებენ, რომ იძულებით გამოსახლების შემთხვევაში ღია ცის ქვეშ დარჩებიან. ამ დროისთივს მათ არც სოციალური შემწეობა აქვთ.

„განცხადება დავწერე სოციალურ სააგენტოში დახმარებაზე და ამ დღეებში მოვლენ შესამოწმებლად“, – ამბობს გუთამზე იაკობაძე.
ბოდოკიამ სარჩელი სასამართლოში 15 მარტს წარადგინა.

შეგახსენებთ, რომ სოციალურად შეჭირვებული იაკობაძეების ბინა სააღსრულებო ბიურომ აუქციონის წესით გაყიდა. იმისთვის რომ ბინა არ გაყიდულიყო, იაკობაძეებს 8 000 დოლარი და 396 ლარი უნდა გადაეხადათ, თუმცა ამის დაფარვა ვერ შეძლეს. ოჯახის დიასახლისი ირწმუნება, რომ მის მეუღლეს ბინა თაღლითურად სხვის სახელზე გადააფორმებინეს.

[თამუნა უჩიძე, ახალციხე]