ასპინძაში საკრედიტო ორგანიზაცია 'ჯი ეი კაპიტალის' შესასვლელი მეორე დღეა ჩაკეტილია

ასპინძაში ყაზბეგის №2–ში მდებარე საკრედიტო ორგანიზაცია „ჯი ეი კაპიტალის“ შესასვლელი დღესაც ჩაკეტილია. გზის გახსნის თხვონით „ჯი ეი კაპიტალმა“ ასპინძის რაიონულ სამმართველოში წერილი გუშინ, გუშინ, 28 მარტს, შეიტანა. თუმცა, უწყებაში განუცხადეს, რომ ეს საქმე სასამართლოს ქვემდებარეა.

„პოლიციაში დამიბარეს და მითხრეს სასამართლოს უნდა მიმართოო. ამის შესახებ წერილობითაც მოგწერთო“, – ამბობს „ჯი ეი კაპიტალის“ აღმასრულებელი დირექტორი ლელა კახიძე.

მისი თქმით, სასამართლო გადაწყვეტილებას ერთ კვირაზე ადრე ვერ გამოიტანს, ამ ხნის განმავლობაში კი ორგანიზაციას საკმაოდ დიდი ზარალი მიადგება.

ამ ზარალის ანაზღაურება კი როგორც „ჯი ეი კაპიტალის“ შენობის მესაკთრე ჯამბულ ხოზრევანიძე აცხადებს, გელა ლონდარიძეს მოუხდება.
გუშინ, 28 მარტს დილით აქ შესასვლელი სწორედ მან ჩაკეტა. ლონდარიძე ორგანიზაციის წინ მდებარე 194 კვადრატული მეტრი მიწის მესაკუთრეა. მან აღნიშნული ფართი აქუციონზე 1 450 ლარად გასული წლის ივლისში შეიძინა.

„პოლიცია დამიკავშირდა და მთხოვა ჩამოდიო, თბილისში ვსაქმიანობ და ასპინძაში არ ვარ. დღეს მივდივარ“, – აცხადებს ლონდარიძე.

შეკითხვაზე, გახსნის თუ არა შესასვლელს სასამართლო გადაწყვეტილებამდე, გვპასუხობს: „არ ვიცი გავხსნი თუ არა, ჩამოვალ და გადავწყვეტ“.

ვიდრე ვითარება დაიძაბებოდა, ლონდარიძემ და ხოზრევანიძეებმა აღნიშნული ფართის შესახებ მოლაპარაკება სცადეს. როგორც გელა ლონდარიძე აცხადებს, ხოზრევანიძე ამ ტერიტორიის შესყიდვას აპირებდა. თავად ჯამბულ ხოზრევანიძე ირწმუნება, რომ პირადად გელა ლონდარიძეს არასდროს შეხვედრია: „მას ჩემი შვილი ელაპარაკა. თან ძალიან დიდ თანხას ითხოვდა ამ მიწაში და ამ ყველაფერს შანტაჟის ფორმაც ჰქონდა“.

„ჯამბულ საწარმოში იყო მოსული ჩემთან და მოვილაპარაკეთ, მაგრამ იმის მერე დიდი დრო გავიდა. რაც შეეხება ფასს, ჩემი საკუთრებაა, ვიყიდე 5 ლარში და ვყიდი მილიონად, რაიმე პრობლემაა?!“, – ამბობს ლონდარიძე.

ისევე როგორც ხოზრევანძეს, სასამართლოს სამართლიანობის იმედი აქვს გელა ლონდარიძესაც: „სასამართლოს წესით გავარჩევთ მტყუან–მართალს“.

შეგახსენებთ, რომ გელა ლონდარიძემ „ჯი ეი კაპიტალის შესასვლელი“ გუშინ, 28 მარტს, დილით ჩაკეტა. იგი გარდა იმისა, რომ აღნიშნული მიწის მესაკუთრეა, ამავე ორგანიზაციის მსესხებელიცაა. ხელშეკრულების პირობების დარღვევისა და სესხის გადაუხდელობის გამო, იძულებით აღსრულების წესით ორგანიზაციამ მისგან დაახლოებით 9 000 ლარი უნდა ამოიღოს. ლონდარიძეს „ჯი ეი კაპიტალმა“ სასამართლო დავა გასული წლის მარტში მოუგო.

[თამუნა უჩიძე, ასპინძა]