უფასო სამართლებრივი კონსულტაცია ეთნიკური უმცირესობების ქალებს

შეხვედრა, დემოკრატიული ჩართულობის ცენტრში, ახალციხის ქალთა ოთახის ორგანიზებით 11:00 საათზე გაიმართება.

უფასო სამართლებრივი კონსულტაცია „კონსტიტუციის 42-ე მუხლის“ მიერ განხორციელებული პროექტის ფარგლებში ეწყობა, რომლის სახელწოდებაცაა „ქალთა, განსაკუთრებით კი ეთნიკურ უმცირესობათა ჯგუფს მიკუთვნებულ ქალთა გაძლიერება და მართლმსაჯულებაზე ხელმისაწვდომობის ხელშეწყობა”.

აღნიშნული პროექტი საქართველოს ორ რეგიონში ქვემო ქართლსა და სამცხე–ჯავახეთში, უფრო ზუსტად კი ხუთ მუნიციპალიტეტებში ხორციელდება: წალკა, თეთრიწყარო, ნინოწმინდა, ახალქალაქი, ახალციხე.

პროექტის მიზანი, ქალთა, განსაკუთრებით კი ეთნიკურ უმცირესობათა ჯგუფს მიკუთვნებულ ქალთა მართლმსაჯულებაზე ხელმისაწვდომობის და სამართლებრივი დაცვის მექანიზმების გაუმჯობესებაა.

მართლმსაჯულების ხელმისაწვდომობისა და სამართლებრივი გაძლიერების ხელშესაწყობად, „კონსტიტუციის 42-ე მუხლი“ აქტიურად იმუშავებს არსებული მდგომარეობის გაუმჯობესებასა და მართლმსაჯულების ხელმისაწვდომობაზე, პროექტის ბენეფიციარებისთვის გაწევს უფასო იურიდიულ დახმარებას, როგორც კონსულტაციების, ასევე, წარმომადგენლობის განხორციელების გზით; მოამზადებს ანალიზს ქალთა უფლებრივი მდგომარეობის შესახებ საკუთარი პრაქტიკის ანალიზზე დაყრდნობით; ასევე, ჩაატარებს ტრენინგების სერიას, რომელზეც მოწვეული იქნებიან პროექტის ბენეფიციარ ქალთა ჯგუფის წარომადგენლები.

[sknews.ge]