ტრენინგი და კონსულტაციები ეთნიკური უმცირესობებისთვის

ტრენინგებს არასამათავრობო ორგანიზაცია „კონსტიტუციის 42-ე მუხლი“ ჩაატარებს. როგორც ორგანიზაციაში განმარტავენ, ტრენინგის თემატიკა შეირჩა რეგიონში არსებული პრობლემატური საკითხების მიხედვით და შეეხება ისეთ თემებს, როგორიცაა გენდერული თანასწორობა, საკუთრების უფლება გენდერული თანასწორობის ჭრილში, ოჯახში ძალადობა და ადრეული ქორწინება.

„ტრენინგის ფარგლებში მოხდება ბენეფიციარების ინფორმირება მათი უფლებების შესახებ, თუ როგორ ისარგებლონ ამ უფლებებით და როგორ მოიქცნენ მათი უფლებების დარღვევის შემთხვევაში“, – ამბობენ ორგანიზაციაში.

ტრენინგის ბოლოს დაგეგმილია კონსულტაციები. პროექტის იურისტები დაინტერესებულ ბენეფიციარებს ინდივიდუალურად გაუწევენ იურიდიულ დახმარებას მათთვის საინტერესო საკითხებზე.

ტრენინგი იმართება პროექტის „ქალთა, განსაკუთრებით კი ეთნიკურ უმცირესობათა ჯგუფს მიკუთვნებულ ქალთა გაძლიერება და მართლმსაჯულებაზე ხელმისაწვდომობის ხელშეწყობა“ ფარგლებში. პროექტს ახორციელებს „კონსტიტუციის 42-ე მუხლი“ აღმოსავლეთ-დასავლეთის მართვის ინსტიტუტის (EWMI) „კანონის უზენაესობის მხარდაჭერა საქართველოში (PROLoG)“ პროექტის ფარგლებში, რომელიც დაფინანსებულია აშშ-ს განვითარების სააგენტოს USAID-ის მიერ.

ტრენინგი ჩატარდება ახალციხეში, დემოკრატ მესხთა კავშირის ოფისში (მისამართი: რუსთაველის ქ. #26). 21 აპრილს 11:00-დან 17:00 საათამდე და 22 აპრილს 09:30-დან 17:00 საათამდე.

[Sknews.ge]