ახალციხის „ქალთა ოთახმა“ მუშაობა შეაჯამა

რას აკეთებდა ორი წლისა და 6 თვის განმავლობაში ‘ქალთა ოთახი’, ამის შესახებ პროექტის „ჰორიზონტის გაფართოება: ქალთა და გოგონათა გაუმჯობესებული არჩევანი, მათი ეკონომიკური გაძლიერებისათვის“ ხელმძღვანელებმა ისაუბრეს. ამ პროექტის ფარგლებში გაიხსნა სამცხე–ჯავახეთში „ქალთა ოთახები“.

მათი შეფასებით, სამცხე-ჯავახეთი წარმატებული რეგიონია, რადგან აქ „ქალთა ოთახები“ აქტიურად მუშაობენ.“

„ჰყავთ მოხალისე ახლგაზრდები და ისინი სკოლებში სხვადასხვა საგანმანათლებლო ღონისძიებებს ატარებენ“, - ამბობს პროექტის ხელმძღვანელი მაია კაციტაძე.

პროექტის ფარგლებში, ახალციხის „ქალთა ოთახმა“ თვითმმართველობის საქმიანობაში ქალთა ჩართულობაზე კვლევა ჩაატარა. ახალციხის „ქალთა ოთახის“ მენეჯერის ნინო რუხაძის თქმით, 2015 წელთან შედარებით, ქალები გააქტიურებული არიან.

„მაგალითად,თუ გასულ წელს სოფლის კრებებს ქალების 9% ესწრებოდა, წელს ეს მაჩვენებელი 16%–ია, რაც ვფიქრობ, რომ „ქალთა ოთახების“ აქტიურობის შედეგია“, -ამბობს ნინო რუხაძე და ამატებს, რომ სოფლებში ქალებისა და ახალგაზრდების გააქტიურებაში ასევე ჩართული იყო ადგილობრივი მუნიციპალიტეტის გამგეობა.

შეხვედრა ადმინისტრაციულ შენობაში გაიმართა. მას თვითმმართველობების ხელმძღვანელებთან ერთად, სამხარეო ადმინისტრაციის წარმომადგენლები და „ქალთა ოთახების“ მენეჯერები დაესწრნენ.

შეხვედრის დასასრულს პროექტის ორგანიზატორებმა სამომავლო გეგმებზე ისაუბრეს და აღნიშნეს, რომ ქალთა და გოგონათა გააქტიურების მიზნით, საგანმანათლებლო ღონისძიებებს გაგრძელებენ.

კონფლიქტებისა და მოლაპარაკებების საერთაშორისო კვლევითმა ცენტრმა „ქალთა ოთახები“ საქართველოს ორი რეგიონის, ქვემო ქართლისა და სამცხე-ჯავახეთის 13 მუნიციპალიტეტში დაარსა.



[ლუბა გიორგაძე, ახალციხე]